HRILH FIAH DAN

Pathian thu zirnaah chuan Bible hrilh fiah dàn hi ‘hermeneutics/ interptretation’ an ti a. Kan thu sawi te, kan thil ziah te hi kan hrilh fiahna a ni nghâl. Eng thilah emaw ngaih dàn kan neih chu kan hrilh fiahna a ni a; ngaih dàn dang nei chuan hrilh fiah dàn dang a nei tihna a ni. 

Middle School-a kan kal lai khân C.A. Parkhurst-a ziah History of India, Pu Lalsawia lehlin kha kan zir a. Robert Clive-a chu ‘The First Founder of the British Empire in India’ a ti a; mi dang pawh chutianga koh ‘pahnihna, pathumna, palina’ tih thlengin an awm. Kum 1857-a helna nasa tak kha Sâpho chuan India mi an nàu deuh vàng nge sipai helna ‘sepoy mutiny’ an ti duh lek chauh a ni! 

Kum 1946-ah RC Majumdar, HC Raychaudhuri & Kalikinkar Datta-ten Advanced History of India (Macmillan) an rawn chhuah a; chutah chuan RC Majumdar-a’n kum 1857 helna kha ‘mutiny’ ti loin ‘Revolt of 1857’ a ti ta zâwk a. Tûna NCERT Text Book, ‘Modern India : A Textbook for Class XII’-ah Bipan Chandra chuan kum 1857-a helna kha ‘First War of Independence’ a ti ta daih a. CA Parkhurst-a’n ‘Mutiny’ a tih chu RC Majumdar-a’n ‘Revolt’ a ti a, Bipan Chandra chuan ‘War’ a ti a; thumal hran, awmze inlen hleih tak an hman chhan chu 1857 helna an hrilh fiah dàn danglam vàng a ni.

Pathian thu zirnaah pawh hrilh fiah dàn hrang hrang a awm thei; kan ngaih dàn danglam vàng a ni. Bible ziaktute pawh hian an thil ziah kha an hrilh fiahna a ni nghâl a; chutiang bawk chuan Bible lehlin pawh hi letlingtute hrilh fiahna a ni thui hle.  

Rawngbàwlna ka luhchilh hnûa ka tum pakhat chu Mizote Pathian thu kalpui dàn her danglam a ni! Kum 1994 kha Central KṬP chuan Pathian thu zir uar kumah a puang a; chumi bawhzui chuan KṬP branch hrang hrangin Bible zirpui tùrin min sâwm a. Châltlâng Bial KṬP te nèn Laipuitláng Biak Ina kan zir chu thupui pahnih, (1) Bible chungchâng leh (2) ‘Pathian thu zir’ tih a ni. Hemi ṭum hian ṭhalaite zîngah ngaih dàn bir deuh ngun mai nei an la tam hle tih ka hmu! Bible kan pawm dàn a thuhmun lo a, kan hrilh fiah duh dàn a hran vàng a ni. Chumi ṭuma ka thu ziah chu a hnûah ‘Pathian Thu Zir Hlâwkna’ tiin a bûin chhuah a ni.

Bible ka hrilh fiah dàn chu mi ṭhenkhat ngaih dàn a  nih loh avàngin kum 1994 vêl aṭang khân ‘liberal’ tih ka hlawh a; Mizo zîngah chuan sawisêl hlawh ber pawl ka ni hial ang! Kum ‘2002 Nilai leh Beihrual Thupui’ ka ziah phei chu ngaih dan bir nei mi pakhatin a hàl ta hial a; Nilai zàn apiangin dâr 9 thleng thlengin an inkhâwm phah ṭhin a nih kha. 

Tûnah chuan kei pawh hi theo­logical college-a thawk tùrin ka ṭhing titih ta. Bible hrilh fiah dàn thar a chhuak zêl a; inzir peih loh chuan kan hlui thuai mai dâwn a lo ni! Tûnah chuan ‘post colonial perspective’ hi Mizote pawh hian kan tuipui ṭan a; missionary-te pawh kha kan hmu tling hlei thei tawh lo a, sawisèl nuam kan ti ṭan! Kristian Hla Bûa sâp hla lehlinte pawh theologian ṭhenkhat chuan an mausàm ṭan! Pathian biak inkhâwm pawh urhsùn leh puithu lam âi chuan a zângkhai leh hlimawm lam kan duh tawh záwk. Kan biak ‘Pathian’ âiin ‘keimahni’ kan inngai pawimawh tawh zâwk mah!

BD final year kan nih kumin mark 40 pû sermon vawi khat kan sawi ṭhin a; kan sermon sawi tùr ziah sâ chu tutorial group-ah zirtîrtute nèn kan thlir hmasa ṭhin. Kei chuan ‘Krista sipai ṭha’ tih ka sawi dâwn a; ka hla thlan chu ‘Râl káp anga kalin’ tih kha a ni. Kan zirtîrtu pakhat Dr. Premnath-a’n ka hla thlan chu thlák tùrin min ti tlat mai a; ‘British imperialist’ hla phuah ti-a ngaih dàn a neih vàng a ni. Thlák lo ila mark ka hmuh tlèm phah dáwn a; lungáwi lo chungin ka thlák ta!

Indian Constitution hi khawvêla constitution sei ber a ni a; hrilh fiah pawh a harsat vàngin  ‘dàn thiamte paradis’ an ti ṭhin. Indian Constitution-ah ‘amendment’ tam tak a awm lehnghâl a; chûng zînga pakhat chu ‘Tenth Schedule of the 52nd Amendment’ hi a ni a, ‘Anti-Defection Law’ an ti mai ṭhin. MLA/MP zîngah anmahni thlangtu kalsana pâwl danga pakaite paihna dàn a ni.

‘Tenth Schedule of the 52nd Amendment’ hmanga MP paih hmasak ber chu Mizorama remna leh muanna a awm theih nâna IPS bànsana politics-a zuang lût Pu Lalduhoma hi a ni. Kum 2008-ah khân Mizo IPS pachal bawk Pu H.T. Sàngliana chu MP aṭangin paih a ni bawk! Mizo IPS, politics luhchilh tân chuan ‘Tenth Schedule of the 52nd Amendment’ hi dàn sakeibaknei a ni ringawt! 

Covid-19 hripui lêng vàng leh ramri humhalha ram pum mipui buai nuai nuai lai, Kohhranin kum tina a hman ṭhin Beihrual thlaah beihrual pawh kan beih theih loh lai takin Isua zirtîr zât MNF MLA 12 zetin Pu Lalduhoma chu bei rualin Mizoram Legislative Assembly Speaker hnênah thu khat vuain an hèk rawn ta mauh mai! Isuan mipui 50,00 a hrai chungchângah Rev. Thansiama’n, “An hrawk a rual mang e!” a tih ang deuhin MLA 12-te hi an thû a rual kher mang e! Thu sàwm pêkah, “I vêngte dâwtin hêk suh” tih a awm. MLA 12-ten Pu Lalduhoma an hêkna hi dâwt a nih leh nih loh chu Speaker-in ‘Para 2 (2) of 10th Schedule of Constitution’ a hrilh fiah dàna innghat tùr a ni. 

Speaker chuan Pu Lalduhoma chu a hrem ang nge hrem lo ang tih chu mipui inrinsiak laih laih a ni! Pu Lalduhoma chunga thu tlûkna a puan dâwn ni chuan Speaker chu uluk taka incheiin ‘serafim’ ni àwm takin Chinese neck kawrchung vâr lam deuh (offwhite) hàin a rawn inthuam a. Ama thiam ang táwka uluk tak, muang cherh chawrh, naupang lehkha chhiar zir ṭan ang maia bah deuh nak siin thu tlûkna a rawn puang ta:

“After a thorough study of the case and hearing the statements from the respondent (Lalduhoma) and the petitioners, it is clearly verified that the MLA has joined the ZPM in theory and practice ... I have no other option but to carry out my solemn duty under Constitution against the MLA, who was elected independently and was not set up by any political party...  therefore Lalduhoma has been disqualified from being a member of Mizoram Legislative Assembly,” tiin. 

Bible hrilh fiahna lamah bawk kîr leh ila. Bible thu awmze bul, a ziaktu tum tak chhui chhuah hi ‘exegesis’ tih a ni a; hetiang hi Mizoten kan man thiam vak lo. Bible thu awmze bul phawrh chhuak loa kan ngaih dàn Bible-a thun luh hi ‘eisegesis’ tih a ni thung a; hetiang hi Mizoten kan chìn záwng tak a ni. 

Pu Lalduhoma MLA nihna paihsak a nih chhan chu Speaker-in ‘Para 2 (2) of 10th Schedule of Constitution’ a hrilh fiah dàna innghat a ni. Speaker hian ‘exegesis’ nge a hman ‘eisegesis’ tih chu a thu tlûkna siam, “who was elected independently and was not set up by any political party,” a tihah hian a hriat theih. Election Commision of India-in ZPM a la pawm fel hman loh avàngin an candidate-te kha ZPM tân independent-in an ding a; ZPM tâna rinawm tùra an intiam lai pawh TV-ah kan lo hmu a. Pu Lalduhoma phei chu ZPM-in CM atân a hual sá diam a ni. 

ZPM MLA a ni tih chu Mizoram sawrkar pawhin a pawm. Information & Public Relations Department, Government of Mizoramin a chhuah hmasak ‘Choice of the People’ tiha Pu Lalduhoma thlalák hnuaiah ‘ZPM’ tih chhut a ni. Speaker pawhin Opposition Group Leader-ah a pawm tawh a nih kha! Eng vànga boruak inlumlet ta thut nge? Mi tam tak chuan Pu Lalduhoma MLA nihna paihsak chhan ‘kaikuang’ chu Assembly session hnuhnung bera Pu Lalduhoma’n ‘peace bonus’ tih chu Chief Minister phuah chawp a ni tih sawi lo thei loa a siam vàng kha niin an ring. 

Pu Lalduhoma’n Chief Minister ṭawngkam lo cheh tawh chu rawn thur chhuakin, “I iptepui rawn ah hi a tê êm a ni; i lo kal leh hun chuan a âia lian deuh rawn ak ang che min ti tihte pawh kha kan hria a. Khatah khân a dawng tlêm pâwl kan ni a, NLCPR aṭang khân. Peace Bonus kha chu a hranpa khân a awm chuang lo a ni tih hi chu tûna a thusawi aṭang khân a chiangin ka hria,” a tih khân CM khân, “A awm lo lutuk a, ka phuah chawp a ni ka tih kha. A awm lo rêng rêng a! Ka phuah chawp a nia,” a ti a nih kha! 

Tûn ṭum thil thleng hian Pu Lalduhoma hi politics-ah a phûm bo hlen ang nge hnehna changin a rawn tho leh ang tih chu Sèrchhîp Bial mipuiin rawn lantîr tùrah ngai ila.