Arsenal leh Vardy inhnim hnai

Premier League champion Leicester City striker Jamie Vardy chu Arsenal-in lakluh tumin an hel mek a, he thu hi BBC pawhin a tarlan tawh avangin season tharah chuan English player hi Emirates Stadium-ah kan hmu ngei dawn niin a lang ta.

Kum 29-a upa Vardy hian season hmasa khan league-ah goal 24 khungin Foxes a champion pui a, Premier League-a goal 25 khungtu Tottenham striker Harry Kane chiah tluk loh a nei. Nikum Febraury thla khan King Power Stadium-ah kum nga chhung cham chhunzawm turin contract thar a ziak a, kar khatah £80,000 a hlawh mek.

England international contract-ah hian pound maktaduai 20-a dawrtu an awm a nih chuan Vardy hian a duh a thlang thei dawn a, Arsene Wenger hian a la lut a nih chuan Football Writers' Association Footballer of the Year atan thlan Vardy hian tuna a hlawh aia tam a hlawh ngeiin a rinawm.

Premier League-a pahnihna Gunners hian Switzerland midfielder Granit Xhaka chu Borussia Mon-chengladbach aṭangin pound maktaduai 30 bawr velin an lo la lut tawh bawk a, sum hman hreh ṭhin Wenger-a'n sum hman a hreh ta lo!

Manchester United-in Louis van Gaal banin Jose Mourinho an la lut a, Manchester City chu Pep Guardiola kaihhruaina hnuaiah an khel tawh dawn a, Italy national team enkawltu Antonio Conte chuan Euro zawh hnuah Chelsea a pan dawn bawk. Season tharah Premier League club lian an insiksawi nasa dawn tih a chiang a, manager ngai la hmang tur Arsenal erawhin player thar an khawm thung dawn niin a lang.

A hun laia non-league club Fleetwood Town tan match 36 a khelh aṭanga goal 31 a khung hnua kum 2012-a pouind maktaduai 1-a Foxes zawmtu Vardy hi Euro khel tur England team-ah a awm mek a, ram tan match riat a khelh aṭangin goal thum a khung tawh.