Vanglaini - Angelina Jolie-i'n film direct dawn

KHAWTHLIR

Hnam dang truck phalsak rih lo

Champhai Import-Export Transport Forum (CEITU), Mizoram Export-Import Union, Importer Exporter Syndicate, MTOA leh MTDA-te November 19, 2020-a ṭhukhawm chuan, Covid-19 hripui laka mipui an him zawk nan hnam dang truck-te'n kumin chhung chuan Champhai aṭangin bungrua phur chhuak ve tawh rih lo se, an ti.

Inhlawhna siamsak

Aizawl North-II MLA Dr Vanlalthlana chuan Covid-19 lockdown avanga a bial chhunga khawsak harsa zawkte tan inhlawhna a siamsak. Covid-19 léng vanga sorkarin inkhàrkhip a kalpui a ngai a, mi tam takin hna thawk thei loin harsatna an tawh avangin, MLA hian a biala chhungkaw 200 chuang tan inhlawhna a siamsak a; thlànmual leh veng chhung hmun ṭhenkhat tihfai a ni.

SRH-ah mi 45 awm

State Referral Hospital-ah nimin khan Covid-19 vei mi pakhat dah luh a ni a, ani nen mi 45 an awm mek a, an zingah kum 60 chung lam mi 16 an tel. SRH-ZMC Bulletin tarlan danin, mi 45 zinga pathum chu ICU-ah enkawl an ni a, mi dang zawng chu Isolation ward-ah an awm a ni.

Journalist thi rál

Chanchinbumi July 14, 2020-a thi Francis Paul (Gerrard-a Pa) chhungte hnenah Mizoram sorkarin a ràlna Rs. 1,00,000 chu nimin khan IPR director Lallianpuii'n Mizoram Journalist Welfare Society kaltlangin a hlàn. Ràlna inhlanna hi IPR Director pisaah neih a ni a, MJA hruaitute an tel. Francis Paul hi Doordarshan Kendra, Aizawla sports magazine buatsaihtu ṭhin a ni a, MJA member a ni.

Complaint tum

ZPM chuan, January 16, 2020-a Tripura leh Mizoram sorkarin Ministry of Home Affairs kaihhruainaa inremna an siam tawh hnu pawha Tripura-a khawsa zui ta Bru-te Mizoram Electoral Roll aṭanga tun thlenga paih an la nih loh avangin Election Commission of India-ah complaint thehluh an tum thu an tarlang. ZPM hian ECI-a zualkona hi Mizoram Chief Electoral Officer kaltlangin November 23, 2020-ah thehluh an tum a ni.

DAWNTISEI

Angelina Jolie-i'n film direct dawn

Legendary war photographer, Don Mccullin chanchin film-a siam tur, 'Unreasonable Behaviour' tih chu Angelina Jolie-i'n a direct dawn.

He film hi Tom Hardy leh Dean Baker-te produce tur niin, "British war photographer zinkawng, dinhmun rethei aṭanga a rawn invawrh chhuah dan, hmun hlauhawm leh indona hmun a luhchilh dante tarlan a ni dawn," tiin an sawi.

Angelina Jolie chuan Don Mccullin chanchin ropui tak, film-a siam theihna remchang a nei chu lawmawm a tih thu sawiin, a huaisenna leh inngaihtlawmna te chuan a hneh hle tih a sawi. Thu dik puanchhuah anih theih nana a inpekna te, indona tuartute khawngaihna leh zahna ropui tak a neih chu hriatreng tlak a ni, a ti.

Jolie hian kum 2007 documentary 'A Place in Time', 2011 anti-war film 'In the Land of Blood and Honey', 2014 true story movie 'Unbroken', 2015 romantic drama 'By the Sea' leh 2017 Cambodian historial thriller 'First They Killed My Father' te a lo direct tawh a ni.

Share this Post

Login to comment

No Comments