France tan Giroud a langsar

Euro 2016 thlengtu tur France chuan Inrinni zan khan 3-0 in Scotland an sawp a, goal hnih khungtu Arsenal striker Olivier Giroud chu khelmual chhunga player langsar ber niin London club tana a khelhpui Laurent Koscielny chuan ram tana a goal hmasa ber a khung bawk.

France-in Euro 2016 khel tura an inbuatsaihna kawnga player lawm hlawh lo ber pawl chu Olivier Giroud a ni. Fan-ten an striker hi a khelh
ṭhat loh apiangin an 'boo' khum a, media-ten nasa takin an sawisel bawk. Mahse, Gunners striker hian khelmual chhungah amah sawiseltute chhang-letin France hmahruaina goal mawi takin a kheng lut a, a goal hnihna khung tura a chet ranna hmuh hmaih theih a ni lo bawk - kum 29-a upa striker hi fan-ten ding chungin zahna an lantir hial.

Didier Deschamps-a'n duhthlan tur a ngah a, midfield laia N'Golo Kante, Paul Pogba leh Blaise Matuidi-te in-kawp-in tharum an ngah piahlamah an thawkrim a, tlarhma lama Giroud thlawptu Kingsley Coman leh Dimitri Payet-te thlak tura Antoine Griezmann leh Anthony Martial-te an la tlanluh theih cheu bawk avangin France hian an ramah ngei Euro nomawi an chawi a nih pawhin a mak lo ang.

Scotland nena an inhmachhawnna inkhelah an tlarhnunga Laurent Koscielny, Adil Rami, Patrice Evra leh Bacary Sagna-te erawhin hna an nei meuh lo a, Romania nen June 10-a Euro 2016-a an match hmasa ber an khelh hunah France tlarhnung ṭhat tawk leh tawk loh a hriat ang.