Lehkhabu bawm : Audio book “Nang bak an awm chuanglo” tlangzarh

Darbu Music leh Audio App chuan an audio book hmasa ber atan “Nang bak an awm chuanglo” -Nathael Vanchhawng ziah June 10 khan “The Book Cafe” Chanmari-ah an tlangzarh a, minister of state Lalnghinglova Hmar-in a tlangzarh a ni.

Release-na program-ah hian Prof. Lalbiakdiki Hnamte MZU, Dept. of Education chuan book review a nei a, audio book a nihna angin awmhmun a ngaihthlak mai a awlsam thu leh, chapter 1 chauh pawh a hlawkpui theih thu sawiin, mimal a hmasawnna tam tak min pek theih tur thu a sawi.

Lalrinnunga Jahau, Darbu Music & Audio Founder/CEO in Technical report neiin “Audiobook hian lehkhabu pangngai dah hniam lo in, lehhkhabu chawisangtu leh ti hlu zual tu a ni,” a ti. He audiobook kaltlanga hlawkna chhar ve turin kal khawmte a chah bawk.

Author Nathael Vanchhawng chuan Pathian leh a nu hnenah lawmthu sawiin, he audio book tlangzarh tura hringnun a paltlang dante a sawi a, a ngaithlatu ten hlawkna pakhat tal an chan a beisei thu a sawi.