Leiminin a hnâwlte hmuh belh a ni lo; Khawtlang huapa ruang zawn khâr a ni

May 28, 2024-a leimin­in in a hnâwla a hnâwl tel zinga la hmuh loh mi panga chu nimin khan zawn chhunzawm leh a ni a, ruang hmuh belh a ni lo. Khawtlang huapin ni sarih zawn a nih tak avangin nimin tlai khan Melthum leh Aibawkah a náwlpuia ruang zawn khârna inkhawm Central YMA bul­tumin buatsaih a ni.

Aibawkah chuan tlai dar 3-ah ruang zawn khârna inkhawm buatsaih a ni a, Aibawk VC president Rosiama'n kaihruaiin, CYMA finance secretary MS Ralte, Aibawk Branch YMA aiawh leh ruang la hmuh loh chhungte'n thu an sawi.

Melthumah chuan tlai dar 4 velah ruang zawn khârna inkhawm buatsaih a ni a, CYMA president Lalhmachhuana'n kai­hruaiin, YMA, Melthum branch leh Hlimen branch aiawh bakah, ruang la hmuh loh chhungte'n thu an sawi a ni.

Melthumah hian leiminin in pali a hnâwlah mi 21 a hnâwl tel a, mi pahnih (hnam dang pakhat leh Mizo naupang pakhat) chu dama lak chhuah an nih laiin, mi 19 an thi. Mitthi 19 zinga 15 chu hmuh an ni tawh a; mi pali - Ramdinsangi (thla 4), Lalvenhima (8), Deborah Lallawmawmi (11) leh Lalṭhakima (42)-te hmuh an la ni ve lo. Melthum leimina thite chu Mizo 15 leh hnam dang pali an ni.

Aibawkah chuan leiminin Matthew Lalchhanhima te chennain a hnâwl a, Matthew Lalchhanhima (34) leh a nupui Vanlalruali (34)-te chu leiminin a hnawl tel a, an fate pahnih erawh chu an tlân chhuak hman thung.

Vanlalruali ruang chu May 31, 2024 khan Tlawng Hortoki kâi aṭanga km. 7 velah hmuh a ni a, Matthew Lalchhanhima erawh hmuh a la ni lo.