Zorinzuali Khiangte hla thar tur 'O' Aceman aw ngaihthlak tur awm dawn

Zorinzuali Khiangte zai ngainatute tan thu lawmawm hriat tur a awm e. Thawhṭanni zanah hian music video thar 'O' a tichhuak dawn a, mit leh beng a tlai dawn.

'O' hi Myztic Sailo phuah a ni a, music chu Lal K Sailo kut chhuak a ni dawn, RDS chuan video hi a buaipui thung a, Spaceville Pro Session Records-ah recording tiin music video a wardrope chu tunlaia dawr lar tak Shop At Judy's a ni bawk.

Zorini Khiangte hian kuminah thawm a nei tam lo hle a, lockdown nen kuminah hun kan hmang tehnuaih bawk nen hla thar a tichhuak dawn tawh lo emaw tih hnuah 'ber' thla kan chuankai meuh chuan a zai ngainatute an hrilhhai lutuk dawnin a hre deuh a niang, hla thar a rawn nei dawn ta a, a zai ngainatute tan chuan a ngaihven chi hle ang.

A zai a ngaihnawm dawn tih chu thuchiang sa a ni a, music video pawh a hmuhnawm dawn hle. 

He hlaah hian fam ta Michael M Sailo aw ngaihthlak tur a awm dawn a, chu chu he hla hlutna tak tur pawh hi a ni. "He hla hi Michael-a kut chhuak hla ka neih hnuhnun ber a ni a, ama record niin min buaipui hla ka neih hnuhnun ber a ni tawh. A aw pawh ngaihthlak tur a awm nual a ni," tiin a hla thar tur hi Michael-a vang pawha a ngaihhlut thu Vanglaini a hrilh.

'O' hi ngaihzawng nena inṭhen vanga ngaih lunglen a nat thu leh kir leh tura sawmna hla a ni a, TV lamah bakah YouTube lamah pawh thlira ngaihthlak tur a awm thuai dawn a ni.



Share this Post

Login to comment
No Comments