Lok Sabha inthlanpuia vote tlate zing dar 8-ah chhiar ṭan a ni dawn

Lok Sabha inthlanpuia returning officer Nazuk Kumar, Aizawl bawrhsap chuan nimin khan Aizawl DC conference hall-ah vawiina Lok Sabha inthlana vote tlate chhiar dan tur thuthar thehdarhtute a hrilhfiah a; Election Commission of India duh dan angin vote chhiarna hmun turte peih vek a nih thu leh zing dar 8-ah vote chhiar ṭan a nih dawn thu a sawi.

Nazuk Kumar chuan, vorte chhiar turin an inpeih tawh thu sawiin, "Counting official-te vote chhiar ní-ah zing dar 6:30-ah thlen tur a ni a, dar 7:30-ah an vote chhiarna tur ṭheuh dawhkana ṭhuin, dar 8 aṭangin vote an chhiar ṭan nghal ang. Postal ballot leh ETPBMS chhiarna atan counting hall hrang DC Office-ah siam a ni a, tun thleng hian ETPBMS 2,656 leh postal ballot 2,107 a lo lut tawh," a ti.

Venhimna thuah thuma kalpui a nih dawn thu sawiin Bawrhsap chuan, "A hmasa berah counting centre aṭanga metre 100-ah hungna siam a ni ang a, a pahnihnaah counting centre luhnaah state armed police force an duty dawn a, a pathumnaah counting hall luhnaah CAPF an duty ang," a ti a; media kaihhnawiah Election department-in authority letter a pekte tan chauh vote chhiarnaah luh phal a nih dawn thu a sawi.

Returning Officer hnenah hian thuthar thehdarhtute'n vote chhiar ní atana sorkar ruahmanna ṭhenkhata duhkhawp loh laite, mamawh leh rawtna an neihte an thlen a ni.

Nazuk Kumar chuan, MP inthlana vote chhiarna chu MLA inthlanpui 2023-a vote chhiarna aia changtlung zawka an ruahman thu a sawi a; media-te'n vote chhiar laia mipui hnena thuthar an thehdarhna tura mamawh an thlente chu ngaihtuahsak an nih tur thu a sawi bawk.

Thu dawn danin, Mizoram pumah vote chhiarna hmun (counting centre) 13 ruahman a ni a, Aizawl district-ah pathum awmin, district dang zawngah pakhat ṭheuh a awm dawn. Counting centre 13-ah counting hall 40 a awm dawn a, counting table 379 a awm.

Vote tlate chu round ngaa chhiar zawh tur Assembly constituency panga, round lia chhiar zawh tur constituency 15, round thuma chhiar zawh tur constituency 18 leh round hniha chhiar zawh tur constituency pahnih a awm a ni.

EVM-a vote tla chhiar zawh vek hnuah constituency tina polling station pangaa VVPAT-a vote tla (paper slip)-te chu EVM-a vote tlate nen a inmil em tih finfiah zel tur a ni a, VVPAT chhiarturte hi pawhfuh hmanga thlan tur a ni. Hei vang hian MLA inthlanpui 2023 aiin vote chhiar chhung a rei phah hret tura ngaih a ni.