Billboard Hot 100-ah BTS an che ṭha

K-Pop band Bangtan Boys (BTS) -in rimawi khawvel an run mek zel a, an ram South Korea lamah politician langsar tak takin an sipai ṭan hun tihkhawtlaite an ngensak mek khawpa an ram mipui pawhin an atchilh rawn mek karah Billboard Hot 100 chart lamah pawh an ropuizia an lantir leh a, Jawsh 685 leh Jason Derulo-te nena an remix Savage Love (Laxed - Siren Beat) chu pakhatnaah an rawn inhlankaipui leh der mai.

Billboard Hot 100 chart-a pahnihna pawh BTS bawk niin an hla hit 'Dynamite' chu pahnihna a ni mek a, hei hian khawchhak lam mai ni lo, khawthlang lamah pawh an tlak nat zia a vawi tam takna atan a rawn tichiang leh ta a ni.

Savage Love (Laxed – Siren Beat)

Savage Love (Laxed – Siren Beat) hi chu kan hre ṭheuh tawh awm e, TikTok lamah a music a lar bawk a a hla hming hre lo pawhin kan hre furin a rinawm. He hla hi New Zealand music producer Jawsh 685 leh American singer Jason Derulo-te'n kumin June 11-a official-a an tihchhuah kha a ni a, ram 17 laiah chart No.1 an nihpui tawh  nghe nghe.

October thla tirah khan K-Pop band BTS hi thawhpuiin a remix version an tichhuak a, hemi version-ah hian Korean ṭawng chang thar dah belh niin kar hmasa khan pariatna a ni a, tunkarah erawh pakhatna a rawn ni ta a ni. Hla 'hit' sa mah ni se BTS vang hian Billboard chart-ah an dinhmun a san leh phah a tih loh theih loh a, Jason Derulo leh BTS-te hian Billboard Hot 100 chart-a No.1 hla pahnih an neih phahna a ni bawk a, an fan-te tan chuan a lawmawm hle ang. Jawsh 685 tan erawh Hot 100 No.1 hla pakhat a neihna a ni chiah thung. 

Billboard Global 200 chart-ah pawh he hla bawk hian No.1 dinhmun a hauh a, hei hian BTS-in ngaihven an hlawh zia a pholang chiang hle.

Hot 100 leh Global 200 BTS tan

Billboard Hot 100-ah hian BTS hian Dynamite pahnihna an nihpui mek a, Billboard Global 200-ah pawh Dynamite hi pathumna a ni mek bawk. Dynamite hi Global leh Hot 100 chart-ah hian pakhatna an lo nihpui ve ve tawh bawk.

Global 200 chart-a pahnihna chu BLACKPINK 'Lovesick Girls' a ni a, hetiang a nih takah chuan K-Pop artist-te Billboard an run mek ti ila kan sawi sualin a rinawm lo. 

BLACKPINK hian an album thar 'The Album' chu Billboard 200 chart-ah No.2 an nihpui mek a, album sales chiah thlir phei chuan US-a album hralh kal ber an nei mek bawk a ni.



Share this Post

Login to comment
No Comments