'Hremhmun Shortcut' a en theih dawn e

Leitlang Pictures Production film thar, 'Hremhmun Shortcut' chu zanin hian Vanapa Hall-ah tlangzarh a ni dawn a, Lersia App-ah chhawp chhuah a ni nghal bawk ang.

'Hremhmun Shortcut' hi 'Thihna nen ni khat' tih ziaktu, Lalhlimpuia Pachuau ziah niin, action/comedy lam hawi a ni. Mi naran pasarih, tum naran lo tak neite hausakna shortcut lamtluang pana an kalna, an tum ram vanram tlafual chu awlsam takin an thleng dawn nge, an duh aia rangin an tum loh lam hrehmun lam an thleng zawk dawn tih kan hmu dawn a ni.

Mizo film industry-a sulhnu tam tak lo nei tawh Mapuia Chongthu, Leitlang Pictures direct a ni a, ani hian film hi 15 chuang zet a siam tawh a ni. Mizoah chuan Director ṭha leh tawnhriat ngah ber a ni hial awm e. Cinematographer hi Isaac Lalchhanpuia leh Mahapuia Chongthu niin, screenplay pawh Mapuia Chongthu a ni.

A changtute zingah mi thar kan hmu nual dawn a, an zingah hian Director fanu, Remruati Chongthu pawh a tel a, Phillip B. Lalrammuanna pawh a rawn debut dawn bawk. Leitlang Pictures film danga kan lo hmelhriat tawh - Rinsiampuii Fanai Ramzotlang Lunglei, Gilbert Colney, Vanlalduhawma Hmar, Lalrina Chawngthu, Mesa Varte, Makima Chawngthu te an rawn lang dawn bawk a ni. Zanina Vanapa Hall-a tlangzarhnaah hian a en duh tan, ticket hi Rs 150-in a hmunah hian lei theih a ni ang.