Zaninah 'Kât leh Daifim' a chhuak dawn ta

Lalbiakzama, MPS (Retd) ziah leh direct, 'Kât leh Daifim' movie chu zanin hian relese a ni dawn ta a, Zonet Empai App-ah a lei theih ang. He App hi Playstore leh AppStore-ah download theih a ni.

Fahrah unau pahnih chu a pu hoin rethei takin an khawsa a, mahse, an puin a thihsan leh thut avangin a u zawk chuan a nau chu enkawl zuiin, lehkha zira eizawnna ngel nghet a neih theihna atan inhlawhin a rem rem a thawk ṭhin. A u chuan thawhpui tur, mi hausa leh thil tithei tak chharin, a nau pawh sorkar hnaah an thun a, mahse, an ruahmanna erawh a nau hian engmah a hre lo thung. An unau chuan nun kawng chhuk chho harsa tak paltlang dun mah se, an hma hun beisei dan a inpersan tak avangin an hmathlir a dang chho zel a, an kawng zawh inang lo tak avangin an inep a ngai zui ta bawk a ni. 'Kât leh Daifim'-ah hian Lalbiakzama'n thil thleng tak tak behchhana a siam, he thawnthu ngaihnawm leh hmuhnawm tak hi kan thlir thei dawn a ni.

Kum 2023 April aṭangin a changtu turte hi zawng ṭanin, an duh ang an hmuh kim hnuah a script hi thla khat chuang film script zirpuina (conditioning) an neihpui leh phawt a, June thlaah shooting hi an ṭan a ni. Kum khat dawn an buaipui hnuah zanin hian en theihin an rawn chhawp chhuak dawn ta. Jeremy Lalngilneia nen a tir phat aṭangin an thawk dun a, ani hi thla latu (Director of Photography) niin, a video hi a edit nghal bawk.