China Kim Kardashian social media-ah an khap

'China Kim Kardashian' tia an sawi ṭhin, Wang Hongquanxing-a chu social media lama a thil neih leh hausaknate a pho lan ṭhin avangin, an rama social media platform hrang hrangah khap a ni.

Kum 31 mi, Chinese social media influencer hian thawmhnaw leh tlereuh man to tak tak a inbelnate a post ṭhin a, USD mtd 1.4 hu vel thawmhnaw leh tlereuh inbel lo chuan a chhuak ngai lo niin a sawi. Mahse China sorkara cyberspace administration chuan social media user-te chu midangte hipna atana an hausakna leh thil neihte pho lan vak vak phalsak an ni lo tiin, Hongquanxing hi social media-ah khap a nih thu a sawi. Hongquanxing hian China rama social media platform lar, Douyin-ah follower mtd 4.3 a nei a, Weibo leh Xiaohongshu-ah pawh follower ṭhahnem tak a nei bawk.