Khiangte Construction Ṭhazual GOSPEL : Ṭhazual Gospel-ah 'A la pangngai reng'-in hma a hruai

Khiangte Construction Ṭhazual Gospel chart tharah One in Christ leh KṬP Lungmual West Branch-te thawhhona, 'A la pangngai reng' tih hla chuan hma a rawn hruai e.

'A la pangngai reng' tih hi Rev. Alfred Lalruatfela (L) phuah niin, a thluk hi Hmangaihkima siam a ni a, music hi Andrew Vanchhawng kutchhuak a ni thung. Studio A-16-ah recording tiin, video hi RDS Shots siam a ni. A video hi a hla phuahtu, Rev. Alfred Lalruatfela hun tawp lam behchhana siam a ni a, KṬP Luangmual West Branch-in an chang a ni. April 15, 2024 zan khan music video hi Luangmual Kohhran Hall-ah Pathian hnena hlanin, April 16-ah YouTube-ah dah chhuah a ni a, thlir leh ngaihthlak a hlawh hle.

Rev. Alfred-a hian natna ṭihbaiawm takin a tlakbuak lai te, thihna kut vawtin man tuma a lo chan lai ngei pawha a kianga awm Lalpain englai pawha a awmpui thu leh, Lalpa'n a hnehsak tawh avanga a hlauhna a bo thu, beiseina thar a siamsak thute lungkuai takin a rawn phuah chhuak a ni. One in Christ hian a phuahtu thinlung leh thil tawnte ṭawmpuiin, mawi tak maiin an rawn sa chhuak a, a video-in rilru a hneh bawk nen, thlirtu tam tak mittui a ko chhuak a ni.

Vohbik 'Engmah lo mai' pawhin hma rawn sawn zelin no. 2-ah a rawn lang a, Lawmi Khiangte hla thar, 'A chhawk duh che' tih pawh no. 3-ah a rawn chhoa, Thlifim hla 'Malsawmin awm se' tih leh, Cindy Lalthanpuii & Puipuia Chhakchhuak 'Kan phal thei lo che' tihte chu Top 5-ah an lang bawk a ni.