Box Office-ah Tenet in $mtd 200 chuang a lalut tawh

US Box Office-ah Tenet bawkin ro a rel chhunzawm leh a, The New Mutant chu sum lalut tam ber dawttu nih chhunzawmin Unhinged chu pathumna a ni leh bawk.

Global Box Office-a che ṭha Tenet

Christopher Nolan-a big budget film Tenet chuan an budget an khum ta a, khawvel ram hrang hrang aṭanga a sum lakluh tawh zat chu $maktaduai 207 lai a ni tawh. Hri len hnua film tlangzarh tawh zingah chuan a sum lakluh a tam fal a, huhang a neih ngah ngaihtuah chuan a awm hle thung. A sum lakluh tawh zat hi India pawisa chuan Rs vaibelchhe 1,520 vel zet a tling.

Tun kar tawp liam taah khan a sum lakluh tawh sa bakah $mtd 37.3 ngawt mai ram hrang hrang aṭangin a lalut leh a, US-ah chuan theatre 2,810 aṭangin $6,700,000 lai a lalut leh a, US Box Office No.1 a la nih chhunzawm.

Tenet hian US lam aiin China lamah sum a lalut tam zawk a, theatre hawn tam tawh zawkna  ani bawk nen kar tawp liam taah khan China aṭangin $mtd 10.2 lai a lalut a, China aṭanga a sum lakluh tawh zawng zawng chu $mtd 50.8 a tling. Tunkarah hian Japan lamah tlangzarh a ni ve leh thung dawn a, a sum lakluh hi chu a la pung zel dawn tih a chiang.

Top 3 dinhmun a ngai vek

Massie Williams channa The New Mutants chuan theatre 2,704 aṭangin $2,089,204 a lalut a, sum hmu chhuak tam ber dawttu a ni. Unhinged chu pathumna la ni leh bawkin $1,516,422 a lalut.

Top 10-ah film thar pakhat

The Broken Hearts Gallery chuan theatre 2,209 aṭangin $1,126,401 a hailut a, hei hi US Box Office Top 10-a film thar inlan awm chhun a ni. Chart hmasaa palina Bill & Ted Face the Music chu pangana  ani ve thung.

Box Office Mojo chuan kar tawp chart a tihchhuahah film 23 list a dah chhuak a, theatre hawn tam lamah erawh kar hmasa lam nena khaikhinin hmasawnna lutuk a awm lem lo.

US Box Office Top 10:-

1Tenet$6,700,000

2The New Mutants$2,089,204

3Unhinged$1,516,422

4The Broken Hearts Gallery$1,126,401

5Bill & Ted Face the Music$292,653

6Words on Bathroom Walls$229,892

7The SpongeBob Movie: Sponge on the Run$225,829

8The Personal History of David Copperfield$194,528

9Peninsula$52,110

10Cut Throat City$41,029



Share this Post

Login to comment
No Comments