Billboard 200: Machine Gun Kelly 'Tickets To My Downfall' hralh a kal ber

Billboard 200 chart-ah album lang thar a awm nual a, chung zinga mi Machine Gun Kelly album thar 'Tickets To My Downfall' chu US-a album hralh kal ber a ni a, SuperM 'Super One: The 1st Album' chu hralh kal ber dawttu niin Joji 'Nectar' chu pathumna a ni.

Tunhnaia Megan Fox nena thawm ngah tak Machine Gun Kelly studio album panga 'Tickets To My Downfall' chu US-a album hralh kal ber a ni a, equivalent album unit  121,000 a hmu chhuak tawh a ni. On-demand audio stream-ah stream, maktaduai 66.1 lai a nei tawh a, album sales 65,800 a nei bawk. Heihi a tlangzarh ni September 25 aṭanga october 1 inkara a hmuh chhuah a ni.

Album a tlangzarh hma hian single pathum 'Bloody Valentine', 'Concert for Aliens' leh 'My Ex's Best Friend'-te a tichhuak tawh bawk a, heng single-te hi kumin chhunga a tihchhuah vek niin a hit hlawm hle.

'Tickets To My Downfall'-ah hian track 15 a awm a, Blink 182 drummer Travis Barker chu a thawhpui langsar niin zaithiam hrang hrang a thawhpui bawk a, chung zingah chuan Halsey, Trippie Redd leh Blackbear-te pawh an tel.

Billboard 200 chart-a pahnihna chu K-pop super group Super M album 'Super One: The 1st Album' a ni a, anni hian unit 1,11,000 an hmu chhuak tawh a ni. Pathumna pawh khawchhak lam artist tho niin, Japanese-Australian R&B singer Joji a ni a, a album 'Nectar' chu pathumna niin unit 93,200 a hmu chhuak.

Top 3-a inlan tharte hi album thar vek an ni a, heng bakah hian top 10-ah album thar inlan dang pathum a la awm. Deftone 'Ohms' chu pangana a ni a, Carrie Underwood 'My Gift' chu pariatna niin Tory Lanez 'Daystar' chu 10-na a ni bawk.

Tun ṭum chart-ah hian Pop Smoke 'Shoot For The Stars Aim For The Moon' chu palina a ni a, Juice WRLD 'Legends Never Die' chu parukna niin kar hmasaa pakhatna Taylor Swift 'Folklore' chu pasarihnaah a tlahniam ve thung a ni.