Chhungkuaa en him 'Kan Chhungkua' a chhuak dawn e

In-House Production feature film 6-na tur, 'Kan Chhungkua' film chu zanin hian Vanapa Hall-ah premiere a ni dawn ta. A hmunah hian a duh tan en theih a ni dawn a, ticket man Rs. 50 chauh a ni ang. Zanin vek hian Lersia Play-ah chhawp chhuah nghal a ni dawn bawk.

Director Drew Pachuau hian camera leh editing lam tikawp nghal vekin, director of photography a ni tel nghal. In-House film dang script ziaktu, Samuel Pachuau ziah bawk a ni leh a ni.

'Kan Chhungkua' hi a film hming ang chiah hian Mizo chhungkaw pakhat chungchang niin, chhungkaw member mize hrang hrang inchawhpawlh kim tak, unau zinga nungchang ṭha bik deuh leh a kawhmawh bawl ching deuhte lam kan hmu dawn. Mizo pa ve tak maiin nu tel loa a fate pathum a enkawl dan chanchin a ni a, chhungkaw tam tak ang thoin inhauh chang leh thinrim chang awm mah se, vanduaina leh harsatna namen lo an tawh meuh chuan chhungkua an nihna a lo lang leh ṭhin a, he film hian chhungkaw pawimawhna a pholang chiang hle. Chhungkuaa en him, nuihzatna tur leh hlimawm lam a awm tam bakah zirtir nei ṭha tak a ni a, Kristian film chu ni chiah lo mah se, a innghahna laimu erawh a Kristian hle thung.

Mizo film-a hriat hlawh sa, Tommy (Lil Toto) leh Maruata te chu lead role la tur an ni a, pa ber Maawma leh Olivia te pawh In-House film dangah an role kan lo hmu tawh bawk. Feature film lama hmel thar ni tur Mapuii leh Annemary te pawh kan hmu dawn bawk a ni.