Vanapa Hall-ah 'Zu Zuar Fanu'

Fanai Pictures, Champhai te movie pahnihna, 'Zu Zuar Fanu' chu zanin hian Vanapa Hall-ah Er. R. Lalrinkima'n a release dawn a, dar 8:30-ah show a ni ang. Zan dar 7 aṭangin red carpet buatsaih a ni dawn bawk. Vanapa Hall-a en thei lote tan pawh Lersia Play-ah en theih tura chhawp chhuah nghal a ni bawk ang.

'Zu Zuar Fanu' hi Champhai district-a Bulfekzawl khuaah chan a ni. Director hi 'Tu Nge I Hming' tih lo direct tawh, F. Lalrindika a ni a, script writer hi Muantea Khiangte a ni. Director of photography Chamtea Grafix leh J15 Production niin, makeup Lalbiaksangi, light & sound Lalremruata leh score Lalramsanga Khualsim te an ni.

A changtute hi Mizo zaithiam lar pahnih, Kimkima leh Jenny Jathang te an ni a, lemchan lamah pawh an lo duai lo a, an inhmeh dun hle bawk. Mizo film lama sulhnu lo nei tawh, Mamuana Fanai te, Lalhmingchawia Sailo, Vanramthangi, Hmingthangmawii, Vanlalchaka te bakah, mi thar ṭha tak tak Kimkimi Hmar, Mali Parte, Hruaia, Chawipuii, KCI te kan hmu tel dawn.

Thingtlang life kan hmu dawn a, zu zawrh avanga hmuhsitna leh a kaihhnawih hrang hrang bakah, nula tlangval inngaihzawnna ngaihnawm tak rawn tarlangin, a hmuhnawm viau a rinawm.

'Zu Zuar Fanu' OST hi a changtupa, Kimkima hian phuahin a sa nghal bawk a, Ṭhazual chart lamah pawh a thlen sanpui hle.