Madonna free concert-ah mi mtd 1.6 chuang pung khawm

Pop idol, Madonna chuan Inrinni liam ta zan khan Brazil-a Rio de Janeiro-a Copacabana beach-ah free concert a nei a, mi maktaduai 1.6 chuang an pung khawm.

Kum 65 mi, Madonna hian music industry-a kum 40 zet hun a hman lawmna pualin Celebration Tour a nei a, Rio de Janeiro-ah hian a kharna hi a nei a ni. Pung khawmte'n an hmuh kim theihna turin beach-ah hian screen lian tak tak leh speaker tower 18 dah a ni a, ṭhenkhat chuan a bul hnaia hotel leh apartment leh, lawng aṭangtein concert hi an lo thlir a ni. Copacabana beach-a free concert-ah hian a hit zinga mi - Nothing Really Matters, Like a Prayer leh Vogue-te pawh a perform tel a, Brazilian singer Anitta-i'n a ṭawiawm bawk. Kum 1984-ah UK charts-ah Holiday tih hmangin a rawn lang ṭan a, hit 71 zet neiin, number 1 ni thei single 13 zet a nei bawk. Kum 1994 New Year Eve khan Copacabana beach-ah vek hian Rod Stedwart chuan free concert a lo nei tawh a, mi maktaduai li chuang pung khawmin, Guinness World Records chuan free rock concert-a mipui pun khawm tamna ber niin a chhinchhiah.