AMC area-ah 'Dâk Pu' show kalpui dawn

Chiangte Videography leh Amawii Hero ṭangkawpin an buatsaih, 'Dâk Pu' chu a hit hle a, Lersia Play-a chhawp chhuah a nih bakah Aizawl Municipal Area (AMC) bikah show kalpui a ni dawn bawk.

Vanapa Hall-a film tlangzarhnaa kalte chuan he film hi hmuhnawm an tiin an hlut hle. Romedy niin, en tawhte'n an fak a, nuihna tur a tam a, a film kalphung a dangdai a, Bollywood, Tollywood rim a nam a tih theih awm e. Leading part latu Alex leh MS-i Hmar te'n an chang ṭha a, part pawimawh dang latu Hruaia Sailo, Adama, Sangteii Renza leh Lianthangpuia te'n an chanpual an hneh hle bawk. April 6 zana tlangzarh kha niin, Lersia Play-ah hian mi 3,000 chuangin an en tawh. AMC area-a film show nei duh tan booking hawn mek a ni.