Miss Mizoram 2024 Jennifer Lalrinzuali Renthlei

June 28, 2000-a piang niin, a pa Jacob Lalrintluanga leh a nu Zodingpuii an ni. Unau pathum zingah a upa ber a ni a, nau hmeichhia leh mipa a nei. Zirna lamah BA (Political Science) distinction-a pass-in a zo tawh a, zirna lam hi a theih chhung chu chhunzawm zel a tum tih Vanglaini a hrilh.

Kum 2022 khan Miss Goverment Aizawl College atan thlan a ni a, Miss Northeast Diva 2023-ah Top 20-ah lo lang tawh bawkin, Miss Northeast 2023-ah 2nd Runners-up a ni bawk.

Jennifer-i chuan Miss Mizoram title chu a ngaihluin a ngaisang hle tih a sawi a, pageantry a luhchilhna bulpui ber pawh Miss Mizoram vang tih a sawi. "Mi puitling zawka min siamtu leh kan nun kal sual tur tam taka min vengtu a ni. Miss Mizoram kan lo neih tawh ṭha tak takte'n keimahah chona leh hma lam pan duhna chi an lo tuh tawh ang khan, keipawhin Miss Mizoram title hmanga ka ṭhalai puite hnenah leh Mizo mipuite hnenah chona leh hma lam pan duhna chi ka tuh ve thei a ni tih ka hria, opportunities tha tak min petu a ni," a ti. Mizo ṭhalaite zirna lama kan ṭhangharh nasa chu lawmawm a tih thu a sawi a, tumruhna leh tei rei peihna neih erawh a ṭul hle tih a sawi." Pathian rin chhan chungin engpawh ti ila mi tumruh kan nih a ngai," tiin a sawi. Beauty pageant a luh tirh aṭanga mite support-na leh fuihna te a ropui a ti a, Mizoram tihmingṭhatu nih zel a tum tih a sawi. "Ka thinlung zawng zawng lawmthu ka sawi a, kan chhungkaw aiawhin lawmthu ka sawi bawk e."