Miss Mizoram 2024 Jennifer Lalrinzuali Renthlei; Zirna lam chawlhsan a tum lo

Miss Mizoram 2024 atan Republic Hmar Veng nula, Jennifer Lalrinzuali Renthlei thlan a ni.

April 26, 2024 zan khan Saizahawla Arcade-a City Sky Hall-ah Miss Mizoram 2024 Grand Finale hmuhnawm tak neih a ni. Contestant 18 aṭangin Top 10 thlan chhuahte zawhna zawh niin, heta ṭang hian Top 5 thlan chhuah leh an ni. Top 5-a thlan chhuahte chu - Rebecca Zothanpuii, Lalhmingsangi, Jennifer Lalrinzuali Renthlei, Evelyn Zachhingpuii leh Lalrinhlui te an ni.

Top 5-te hian zawhna inang vek chhangin, an zing aṭang hian Miss Mizoram 2024 atan Jennifer Lalrinzuali Renthlei chu thlan a ni ta a ni. Ist runners up-ah Evelyn Zachhinpuii, Saikhamakawn leh 2nd runners-up-ah Rebecca Zothanpuii, Khawzawl thlan an ni bawk.

Top 5-te common question hi,"Kan chhehvela environment humhalhah kan ṭhangharhin i hria em, environment chhe zel tur venna atana thil pawimawh i tih min hrilh thei em?" tih a ni a, he zawhna hi Miss Mizoram 2024 Jennifer chuan heti hian a chhang, "Kan ram chhehvel environment humhalh kawngah hian Mizote hi kan ṭhangharh nasa em em a, mahse, hmabak erawh a la ko hle."

"Kan zirna, elementary section aṭanga tuna aia nasa leh uar zawka kan inzirtir a, mi tin, chhungkaw tinin kan inchhung vawn fai leh, kan in leh a chhehvel vawnfaina kawngah ṭan kan lak a pawimawh ka ti em em a. Mimal tinin kan awmna hmuna ṭan kan lak chuan, rah chhuah a thlen ngei ang. Mizoram hi kan state neih chhun a ni a, kan ta a ni a; kan hmangaih tak tak chuan, khawi hmunah pawh kalin intihlimin, hmun nuam tak tak lui leh leh tlangah pawh kal ila, kan tihhnawk phal mai mai ka ring lo. Pathianin ram nuam tak pakhat min pe a, chu chu a venhim, vawnfai leh enkawl hi kan tih makmawh a ni."