Lianzuala te inlan hun a thleng leh ta

Indian Super League semifinal second leg-ah zanin dar 7:30 hian Mumbai City chuan FC Goa an mikhual dawn a, team pahnih intawng tur hi a boruak a sang dawn tih a chiang.

Semifinal first leg-ah Mumbai hian 3-2 in FC Goa hi an hneh a, inkhel satliah a ni lo - minute 90 hnuah Mumbai hian goal thum an khung a, heng zinga goal hnih hi Lallianzuala Chhangte khung a ni.

A tawi zawnga sawi chuan Lianzuala'n Mumbai beiseina a chhit nunsak a tih theih a, Goa tan Mizo tlangval hi hmelma nunrawng a ni! Goan club tan mahni mual ngeia an tlawm dan kha a tlawm thlak tawpthang a, phuba lak an châk dawn.

Mumbai pawh mahni muala khel tur mah ni se, an san zawkna hi goal khat chauh a ni a, minute rei lotêah an dinhmun hi a danglam thei tih hriat a ṭha - zaninah fimkhur taka an khelh a ṭul ang.

Phuba chu

First leg-a Goa tlawm dan a na a, Mumbai chak dan lah a chak lam tan chuan lawma sapatal pawh thil awm tak a ni - Goa khelmuala khati taka an chak an lawm kha Goa coach Manolo Marquez chuan a hrethiam lo a, phuba lak ngei a tum.

Spanish coach Manolo chuan, "Player chu ni ila, Mumbai player-ten kan hmai hmaa chak an lawm dan khan min tithinrim ngawt ang. Minute 90 dang a la awm tih hre rawh se.

"Mumbai-ah tuin nge chak chu lawm zawk ang, kan hria ang chu," a ti a, Mumbai Football Arena-ah chak ngei a tum a, chumi tur erawh chuan a nauten rilru huaisen tak an put a ṭul dawn - Mumbai an ṭha tlat.

Spanish coach Manolo hi budget nei tam lo chunga ISL-a hmuhnawm taka Hyderabad kaihruai theitu a ni a, 2021-22 season khan Hyderabad hi champion nomawi a chawipui hial - Goa tan chawi leh a tum ang.

A hming Lianzuala

Mumbai tan tlarhmaah Lallianzuala Chhangte chu player pawimawh a ni leh dawn a, Goa-in hnehna chan an tum chuan Lza ven dan an ngaihtuah a ṭul dawn - a nih loh chuan Lunglei tlangval hi Goa hrem turin a insum lo ang!

ISL hero of the league ni lai Lianzuala hian league match 23-ah goal kua khung tawhin, assist vawi ruk a nei a, tlarhmaa Jorge Pereyra Diaz hian match 15-ah goal riat a khung tawh bawk.

India striker Vikram Pratap Singh hi thaibo a rem lo - match 21-ah goal riat khungin, assist vawi thum a nei a, tlarhmaah a hriam tlat. Midfielder Lalengmawia Ralte (Apuia) sawi tel a ngai a, match 20-ah goal khat khungin, assist vawi hnih a nei.

Apuia dinpui ṭhin, Dutch midfielder Yoell van Nieff hi Eredivisie-a Groningen tana lo khel tawh a ni a, a tawnhriat ringawt pawh hi Mumbai tan chuan ṭhatpui tham a ni. Mumbai hian Mizo defender Hmingthanmawia (Valpuia) an nei bawk.

Goa an ṭha em?

FC Goa-in Mizoram player Ayush Dev Chhetri an kawl a, mahse, Dinthar tlangval hi a la nau deuh avangin zan inkhel boruak sangah a inlan a rinawm loh zawk - tun season-ah league match 10 a khel tawh.

Goa-in a vawi hnih nana champion nomawi chawi an duh dawn chuan Noah Sadaoui chet ṭhat a ṭul a, Morocco tana vawi li inlan tawh forward hian league match 22-ah goal 11 khungin, assist vawi nga a nei.

India international Brandon Fernandes hi penalty box hnaihah chuan chance pek loh tawp a fuh ber. Goa fapa rangkachak hian tun season-a league match 19 a khelh aṭangin goal thum a khung tawh a, assist vawi li a nei bawk - box pawn aṭanga a shot hlauhawm tak ṭhin chu a hming chherna a ni.

Tlarhnungah Goa tan Dheeraj Singh chet ṭhat a ṭul a, defender Jay Gupta, Odei Onaindia, Seriton Fernandes leh Nom Dorjee te ho an ṭan khawng tlat a ṭul bawk.

A la chiang lo

Mumbai-in 3-2 in khualmualah hnehna an chang a, an beidawn duh loh rah an seng. Mahse, an phur lutuk ang a, second leg-ah an phur sual palh ang, tih chu thil hlauhawm a ni - fimkhur a ṭul dawn.

Lza chuan, "Engmah thil chiang a la awm lo a, thlamuang taka awm hle hle thei kan la ni lo. Mahse, kan dinhmun chu a ṭha zawk chiang a lawm," a ti a, goal khat an neih sa bakah mahni mualah an khelh dawn avangin an chance a ṭha tih Vanglaini a hrilh.

Lianzuala hi season hmasaa ISL hero of the league chawimawina a dawn khan Sunil Chhetri tih loha Indian player zinga he chawimawina dawng hmasa ber a ni a, tun season-ah Mumbai hi a champion pui a nih ngat chuan a zawnin he lawmman hi a dawng lo ang tih a sawi theih loh.

Lunglei tlangval hi AIFF Player of the Year ni lai a ni bawk a, Sunil Chhetri-a'n uai thlak lam a pan tawh bawk avangin a hmun ruak luah tur Indian football hrechiangtuten an inrinsiak mek a, chumi karah chuan Mizo tlangval a lo ding chhuak - a vul zel nan zanina chak a ṭul.