Vanglaini - Actor sum lalut tam ber 'The Rock'

KHAWTHLIR

Ramri vengtu zinga mi a thi

C Lalṭanpuia (46) s/o C Sualneka, Champhai Vengthlang chu August 12, Nilaini zan dar 7 khan rannung seh natna (scrub typhus) vangin a thi a, nimin khan vui a ni. A nupui H Lalnuntluangi leh an fate pali a kalsan. Thu dawn danin, C Lalṭanpuia hi Champhai Vengthlang YMA president a ni a; Covid-19 laka invênna atana ramri vennaah hun eng emaw chen a riak lut ve a, chuta ṭang chuan a thihpui tak rannung natna hi a kái a ni.

SRH-ah mi 59

State Referral Hospital-ah Covid-19 vei mi 59 enkawl mek a ni a, niminah dah luh thar an awm lo. Mi 59 zinga pakhat chu ICU-ah la awm zelin, ṭhat lam a pan a, Isolation Ward-a awm mi 55 zingah khawsik sang vak lo nei pahnih an awm a, ngaihtuahawm an ni lo. SICU-ah mi pathum an awm bawk.

1,717 khung hrang

August 12, 2020 thleng khan Mizoram hmun hrang hranga quarantine facility-ah khung hran mi 1,717 an la awm. Khung hrante chu Aizawl district-ah mi 853, Lungleiah 159, Siaha-ah 44, Champhaiah 42, Kolasib-ah 344, Serchhipah 91 Lawngtlaiah 89, Mamitah 54, Saitualah 17, Khawzawlah pakua leh Hnahthial district-ah mi pakhat an la awm a ni.

Antigen Test-in endik

Champhai Chief Medical Officer office chuan DC thupek bawhzuiin nimin khan frontline worker, sumdawng leh muṭia/porter-te'n Covid-19 an vei leh vei lo Rapid Antigen Test hmangin an endik a, hripui vei hmuh chhuah a ni lo. Champhaiah hian Rapid Antigen Test hi July 22, 2020-ah hman ṭan a ni a, mi 150 endik tawhin, Covid-19 vei mi pali hmuh chhuah tawh a ni.

Thisen pe

KṬP, Bethlehem Venglai Branch chuan nimin khan thisen pek rûnpui an huaihawt a, Aizawl Civil Hospital tan thisen unit 53 an pe a, a petute mipa 43 leh hmeichhia 10 an ni.

Sorkar chawlh

GAD chuan nimin khan notification tichhuakin, village council leh local council inthlan ní - August 27, 2020 chu inthlanna tur district-ah sorkar chawlh atan puan a ni tih a tarlang. Chawlh puan hi mipuite'n vote an thlak ṭheuh theihna atana tih a ni a; inthlanna tur - Aizawl, Lunglei, Champhai, Kolasib, Serchhip, Mamit, Saitual, Khawzawl leh Hnahthial district-te a huam a ni.

DAWNTISEI

Actor sum lalut tam ber 'The Rock'

Wrestling a bansan hnua film lam a luh chilh pawha hlawhtling zui ta Dwayne "The Rock" Johnson chu Forbes chuan mipa actor zinga hlawh hnem ber a nih thu a tarlang.

Thawhlehni khan Forbes chuan kumtina film lama hlawhhnem a tarlan ṭhin chu a tichhuak thar leh a, mipa lemchan thiam zingah The Rock chuan kum 2019, June 1 aṭanga 2020, June 1 chhungin $maktaduai 87.5 a hlawh tih a tarlangin, kum hnih a zawna mipa hlawh hnem ber a ni ta a ni.

Frobes-in The Rock-a sum hmuh tamna a tarlan te chu: Red Notice leh Under Armour Inc ('Project Rock' fitness wear) te a ni a, heng bakah hian a lemchan leh thildang aṭangin sum tam tham tak a lalut bawk. The Rock dawtah hian Blake Lively pasal Ryan Reynolds a awm a, ani hian $mtd 71.5 a hlawh a, Mark Wahlberg chuan dawt lehin awmin, ani hian $mtd 58 a hlawh ve thung.

India film star zinga sum lalut tam ber chu Covid-19 dona atana pawisa thawh hnem ber pawl, Akshay Kumar niin, mipa lemchan thiam sum hailut tam zingah hian parukna a ni a, ani hian $mtd 48.5 a hlawh a ni.

Ben Affleck, Vin Diesel leh Will Smith-te pawh lemchan thiam sum hailut tam zingah hian an lang a, Asian mipaah chuan Ashkhay bakah hian Jackie Chan a lang bawk.

Forbes hian kumtinin lemchan thiam mipa leh hmeichhe zinga sum lalut tam list hi a tichhuak ziah a, an sum hailuhna kawngah hian an lemchan aṭanga an hailuh chiah an chhinchhiah lem lo a; advertisement emaw sum lakluhna kawng dang an neihte emaw pawh a chhut tel sak ṭhin.

Kumin list-ah hian Iron Man actor Robert Downey Jr chu lang lo langsar zingah a tel a, a ni hi kum dangah chuan hming langsar a ni ṭhin. Nikum lamah kha chuan Avengers: Endgame hit chhoh lai a ni bawk nen Avengers actor-te kha an lang nasa hle a, kuminah erawh Avengers actor zingah chuan Vin Diesel chiah hi a lang ta a ni.

Film star mipa hlawh hnem te:

1Dwayne Johnson – $87.5 million

2Ryan Reynolds – $71.5 million

3Mark Wahlberg – $58 million

4Ben Affleck– $55 million

5Vin Diesel– $54 million

6Akshay Kumar– $48.5 million

7Lin-Manuel Miranda– $45.5 million

8Will Smith– $44.5 million

9Adam Sandler– $41 million

10Jackie Chan– $40 million

Share this Post

Login to comment

No Comments