Mafaa pualin Cindy Lalthanpuii'n hla tichhuak dawn

Mizo gospel singer zinga tunlaia huhang ngah ber pawl Cindy Lalthanpuii chuan Inrinni zanah hian music video thar 'Hlau suh, ka awmpui che' a tichhuak dawn.

'Hlau suh, ka awmpui che' tih hi hla thar a ni lem lo a, Kristian Hlabua mi niin December 30, 2018-a fam ta, thu leh hla lama miril Mafaa Hauhnar pualin a music video thar hi a tichhuak dawn a ni.

He hla hi Mafaa khan a duhin a ngaina ṭhin hle a, amah an ral ṭum pawhin Cindy hian thiam takin a sa nghe nghe a, chu chu YouTube lamah pawh hmuh tur a awm a, mahse a hmuna lo awmte lakchawp mai a nih avangin duhthu a sam lo hle. 

Hetiang a nih avang hian mi hrang hrangin an ngen avangin Cindy hian music video puitling buaipui a tum ta a, Bika studio lam luhchilh nghalin a buaipui chhunzawm nghal a, zanin hian kan thlirin kan ngaithla thei dawn ta a ni.

Cindy chuan, "Hehla hi Mafaa hla duh berte zinga mi a ni tih ka hria a, a puala music video ka siam thei tur hi ka lawm hle a ni. Thlamuanna hla a nih ang ngeiin, ngaithlatu zawng zawngte'n thla­muanna thar lo chang ṭheuh se tih hi ka duh thu­sam leh ṭawng­ṭai­­­na a ni," tiin, ngai­­­thlatute'n thla­muan­na thar chang se a duh thu a sawi.

'Hlau suh, ka awmpui che' tih hla hi sap hla aṭanga lehlin a ni a, Rev. Liangkhaia lehlin niin fakna hla lar pawl tak a ni reng a, Cindy ngei pawh hian thiam takin a lo sa fo tawh a ni.

Music hi Kima Chhangte kut chhuak a ni dawn a, Mawitea Hauchhum (RDS Shot) chuan video hi a buaipui sak thung.

Inrinni zanah hian Zonet lamah thlira ngaihthlak theihin a awm tawh dawn a, Cindy Lalthanpuii YouTube channel lamah pawh thlira ngaihthlak theihin a dah chhuak nghal dawn bawk.



Share this Post

Login to comment
No Comments