Russia-in Ukraine drone 17 an kap thla

Russian defence ministry chuan an ram chhunga rawn thlawk lut Ukrainian drone 17 chu nimin khan an kap thla tih a puang. Heng drone zinga ṭhenkhatte chuan Kaluga huam chhunga oil dah khawmna hmunte chu an bitum niin an tarlang.

Kaluga governor, Vladislav Shapsha chuan Ukraine drone-te chu oil depot bul hnaiah Russia air defence system chuan a kap thla tih sawiin, thil tihchhiat emaw nunna chân emaw an awm loh thu a sawi. Russian defence ministry pawhin Bryansk region-ah drone pakua kah thlak a ni tih an tarlang a, hemi bakah hian Kursk region-ah pathum leh Belgorod region-ah pahnih an kah thlak thu an sawi bawk a ni.

Russia hian an ram chhunga Ukraine chetna hi a tarlang khat hle a, an ram chhunga sipai hmun leh hmasawnna ruhrel Ukraine-in a beih pawhin Russia chuan mipui hriat turin a tarlang khat hle. Ukraine hian Russia sipai bakah oil leh kâwlphetha pek chhuahna hmunhma leh inkalpawhna kawngpui bitum ṭhinin, chumi hmang chuan Russia chakna tihnep a tum ṭhin a ni.

Inrinni khan Russia chuan Ukraine chu missile hmangin a bei a, missile-te hian Ukraine rama oil leh kâwlphetha dehchhuahna ruhrel an bitum a ni. Ukraine air force chuan missile 34 zet Russia-in an kah chhuah thu tarlangin, heng zinga 21 chu an air defense sysytem hmangin an kap thla niin an tarlang.

Minister of Energy, Herman Halushchenko chuan Dnipropetrovsk, Ivano-Frankivsk leh Lviv a kâwlphetha dehchhuahna hmunte chu beih an nih thu sawiin engineer pakhatin hliam a tawrh thu a sawi bawk. DTEK chuan an thermal power plant enkawl lai pali chu tihchhiat a nih thu sawiin hliam tuar an awm nual tih tarlang mah se, a zat erawh an sawi lang lo thung.