Lehkhabu bawm : C. Lalawmpuia 'Tualchher Criticism' tlangzarh

'Rambuai Literature' ziaktu, C. Lalawmpuia Vanchiau lehkhabu, 'Tualchher Criticism' chu nimin khan MZP Conference Hall, Treasury Square, Aizawl-ah Prof. Margaret Ch. Zama'n a tlangzarh.

Lehkhabu tlangzarh inkhawm hi Lalsangzuala, Asst. professor, Department of Mizo, Mizoram University chuan kaihruaiin, lehkhabu thlirlawkna hun hi Dr. Lalrammuana Sailo, Asst. professor, Dept. of Mizo, PUC-in a hmang.

'Tualchher Criticism'-ah hian Zikpuii Pa leh JF Laldailova thuziak, an inhnialna leh an thu inchuh thlirna te, Siamkima thuziaka thu inkalh laite chenin a thur chhuak. Ropuiliani a tlawm lohzia leh Lalhmingliana Saiawi thuziak danglam bikna te, tuai leh patil hmanlai Mizo nuna an lo lan dante pawh a rawn ziak bawk. Zuahliana thuziak hrang hrang thlirna a awm a, rambuai hun behchhana Rokunga leh Lalṭanpuia Sialsuk hla phuah leh a hnua an hlate thlir zuina a lang. Mafaa thuziak hrang hrang leh a ngaih dante a phawrhsak nasa a, Kaphleia thuziak leh a nun danglam bikna te ngaihnawm leh fiah takin a chip bawk. Rs 350 man a ni.