Vanglaini Bihchianna - Entrepeur Huang : Aizawl Garbo (Door-to-door Garbage collecting Agency)

Aizawl khawpuia chhungkua, office leh sumdawnnate'n an bawlhhlawhte awlsam zawk leh hun heh loa an paih theihna atan leh, bawlhhlawh paih motor chang hman lo mi tam takte chhawk zangkhaina tura din, Aizawl Garbo chu Vanglaini chuan a bihchiang.

Vision:

Aizawl Garbo hi February 14, 2024-a din niin, founder hi C. Lalmuankima a ni a, co-founder C. Lalrinsanga, Lalawmpuia, Lalngaihzuala leh Robert Lalbiaksanga te an ni. An tum ber chu bawlhhlawh paih leh sawngbawl danah mumal leh rang zawk, ngelnghet leh rintlak service pek a, kan ram ngaw leh luite kan tihbawlhhlawh zel lohna tura mumal taka bawlhhlawh lak khawm, paih leh sawngbawlna din a ni. An auhla atan pawh “Your trash, Our Priority” tih an hmang. Kan chhehvel thianghlimna leh khawtlang hrisel kan neih theih nan mi tinin mawh kan phur tih inzirtirna a nih an beisei bawk. Aizawl khawpui kawngpuite a zau tawk loh avangin traffic a tawt chak a, chumi hre chung chuan zan lamah chauh khawnin AMC bawlhhlawh paihnaah an paih nghal ṭhin.

Empowering Client:

Aizawl chhungkaw tam zawk hian tui haw, gas sem leh bawlhhlawh motor changin hun kan khawhral hnem hle. Heng zinga bawlhhlawh paih dan tal hi sutkian dan a awm lo maw tiin, Aizawl Garbo tih chu Ramhlun Venglai huam chhung aṭangin bul an ṭan a, questionnaire-te semin door-to- door-a bawlhhlawh paihsak duh an awm leh awm loh an zawt kual a ni. Bawlhhlawh paih motor chan hi chhungkaw tam tak tan a buaithlak a, veng tam takah sanitation point-a bawlhhlawh lo dah lawk hi phal a ni lo bawk. Chung zawng zawng sutkian theihna tur chuan zan lamah an kawtkaia mi ngei lak khawm a, a paihna tur motor siam bik hmangin, kawng zim leh penhleh deuha mi pawh a khawntu insiamin khawn ṭhin ni se tiin bul an ṭan a ni.

Services :

Tunah hian Aizawl Garbo hi mi panga, founder leh co-founder-te hian an enkawl mek. Zan lama ṭhalaite hna thawh tur siamsak a, a tuk lama an hna dang thawh tibuai siloa kalpui mek a ni. Bawlhhlawh paih motor 3 nen Aizawl veng hrang hrang - Ramhlun Venglai, Ramhlun N, Ramhlun South, Chanmari, Zarkawt, Tuikual, Mission Veng, Mission Vengthlang, Kulikawn, Venghnuai, Vaivakawn, Chaltlang, Laipuitlang, Bawngkawn, Durtlang, Zonuam, Falkland, Aizawl Venglai leh Upper Republic-ahte bawlhhlawh laksakin an paihsak ṭhin. An service hluttu an pawh an pun belh zel.

Service an neihte :- Domestic Waste Collecting Service, Commercial Waste Collecting Service leh Events Waste Management Service te a ni. Kar tin Thawhlehni zan, Ningani zan, Zirtawpni zan leh Inrinni zanah te bawlhhlawh hi khawn ṭhinin, ṭawihthei leh ṭawihthei lo bag hrana khung khawm saa mahni kawtkaia lo dah chhuah lawk mai a tawk a ni.

Heng bakah hian insakna bawlhhlawh, dawr leh thil dang bawlhhlawh paih duh tan a hranpaa hire theih an ni bawk. An hmalakna hi AMC pawhin an phurpui a, AMC hnuaia agency ni turin registration an dil mek. Data felfai zawk, hun lo kal zel turah researcher-te tana ṭangkai tur neih pawh an tum a ni.

Events Waste Management Service:-

Kan hunpui, kût leh leh mipui pun khawmna hmunah bawlhhlawh kan paih darh nasa ṭhin hle. Hengah hian awlsam leh felfai zawka seng hawi a nih theih nan Aizawl Garbo hian Events Waste Management Service an pe thei a ni. Annual Report – CPCB 20-21-in a tarlan danin, Mizorama bawlhhlawh, ni tin 345.47 ton siam chhuahah 69.55 ton lak khawm loh a awm a, chu chu bawlhhlawh kan siam chhuah aṭanga 20% lai a tling. Bawlhhlawh hal hi danin a phal tawh lo a, pollution tam tak a siam a ni. Kawng dung leh lui dung, kawr leh ramhnuaiahte paih lo tura kan inzirtir chuan rei loteah khawpui fai leh thianghlim tak kan nih theih a rinawm. Mi ṭhahnem ngai, environmentalist, khawtlang mipui ṭangrual leh pawl hrang hrangte thawhrimna zarah kan lui dung leh lui kawr te, kawtthler leh kawngdungte pawh thenfai ṭhin a ni. Bawlhhlawh paih dan awlsam leh zangkhai zawk inpek hian kawng tam takin kan khawpui bawlhhlawh tam tak riral ṭhin hi kan hum theih ngei pawh a beiseiawm.

C. Lalmuankima.

Founder - Aizawl Garbo.

Contact : 6009878706,9862284819,8730970151.