Zaninah Miss Mizoram 2024 Grand Finale
Zonet TV Pvt. Ltd. leh Mizoram Journalist Association (MJA)-in an buaipui, Miss Mizoram 2024 thlanna neih mek chu zaninah a hmawr bawk a ni dawn. Miss Mizoram 2024 kan hre thei dawn ta e.
Saizahawla Arcade-a City Sky Hall-ah Grand Finale hi neih a ni dawn a, Zonet Zawlbuk leh Zonet Empai App-ah live-a pek chhuah a ni ang.
Grand Finale zan hian contestant 18-te hian Traditional Wear leh Evening Gown round an rawn nei leh dawn a, Sub-title pali la sem loh - Miss Congeniality, Miss Beautiful Skin, Beauty With a Purpose (BWAP) leh People's Choice winner te puan an ni dawn a, BWAP winner clip thlirho a ni bawk ang. April 23, 2024 zan khan sub-title night hman niin, category paruk-a winner te puan an lo ni tawh a ni. Miss Mizoram Instagram leh Facebook account-a contestant-te thlalak/reels post aṭanga like ngah ber chu People's Choice atan thlan a ni dawn a, Top 10-ah a inhlangkai nghal ang.
Top 10 thlan chhuahte hi zawhna zawtin an chhanna aṭangin Top 5 thlan chhuah a ni ang a, Top 5 te hi zawhna zawh leh an ni ang a, an zing aṭang hian Miss Mizoram 2024 thlan a ni tawh dawn a ni.
Intihsiakna neih chhung hian contestant-te hi grooming session neihpui an ni a, hei bakah hian glam leh resort wear shoot nei bawkin heng hunah hian Aeries Boutique, Zozoi Khawlhring, Biaknia Tlaisun leh Benjamin Ralte Design Studio kutchhuakte an ha.
Judge-te
Miss Mizoram 2024 thlannaa judge-te chu :
Vanlalrema Vantawl - MJA member leh 'Zalen' editor a ni a, kum 2020-a Miss Mizoram thlanna neihah khan judge a lo ni tawh bawk.
Brigitte Zohmingi - Miss Mizoram hmasa ber niin, kum 1984-ah thlan a ni.
Biakchungnunga - MJA member leh 'The Aizawl Post' news editor.
Nunui Rualhleng - Miss India Mizoram 2019.
Judge zinga mi, Nunui Rualhleng chuan Vanglaini zawhna chhangin, "Kumin 2024-a Miss Mizoram judge tura min sawm hi a hlu ka ti a, ka judge-puite nena kan thawhhona pawh a ṭha hle. Contestant-te an ṭha tlang a, a hautak map map khawp mai. Kan endik danah hian mark khawlin kan kalpui a, final zan chauha chet ṭhat a tawk dawn lo tih an hria a, contestant-te pawh an ṭang hlawm viauin ka hria." a ti.
Miss Mizoram thlan hi a hô ti pawl pawh an tam a, mahse, kan sawi duh chu hetiang lama tui leh hemi aṭanga an hma hun daidar duh tan chuan kailawn pawimawh leh hlu tak a ni. Rilru put a dik a, mahni nun invawn uluk chuan hna zahawm a ni. Kei pawh hi a tak ngeia hmutu leh chhawr ṭangkaitu ka ni awm e," a ti.
Perform turte
Miss Mizoram 2024 Grand Finale-ah hian performance hmuhnawm tak tak kan hmu tel dawn. Tunlaia Mizo artist lar - Ruatpuii, Lilac leh Deborah Ralte-te an zai dawn a, anni bakah Mizo Dance Camp lam an rawn che dawn bawk a ni.
Host - Rini Hlondo
Rini Hlondo hian zanina Grand Finale hi a host leh dawn. Ani hian kum 2017, 2018 leh 2020-a Miss Mizoram thlanna neihah khan a lo host tawh bawk a ni. Rini chuan,"Miss Mizoram 2024 thlanna turah hian kan inpuahchah nasa a, judge-te pawh an ruat fuh hlein ka hria. Grooming session neihpuitute pawh an ṭha hlawm hle a, finalists-te pawhin an hlawkpui em em a ni" tiin contestant-te chu an ṭha tlang hle tih Vanglaini a hrilh.
Sponsor
Miss Mizoram 2024-ah hian Directorate of Women & Child Development (WCD) chu main sponsor an ni. Anni hian Miss Mizoram 2024 atana thlan chhuah chu ambassador atan an hmang nghal ang. Co-sponsor te chu - UDPA Department, Atomy India, GIG Motors leh Mams Food te an ni.