Khiangte Construction Ṭhazual Lengzem : Youngfella 'Pasalṭha' a huai ber

Khiangte Construction Ṭhazual Lengzem chart-ah tunlai Lengzem artist boruak nei lian ber zinga mi, Youngfella 'Pasalṭha' ngam an awm lo a, a chung berah a awm.

'Pasalṭha' hi Mizo film chhuak thar tur, 'Dak Pu' OST a ni a, Yougfella hian March 6 khan a YouTube channel-ah dahin, thla hnih pawh a tlin hmain view 4.4 million a nei der tawh. Music leh recording hi Smiley kutchhuak niin, music video hi Chiangtea Videography Production siam a ni thung. Youngfella hi ṭhalai zingah a la tla na chhunzawm zel a, a hla chhuak thar apiang a hit chho zel mai a ni. A hlate hi catchy tak, rilrua cham zui leh sak zui hlawh tak tak an ni a, ngaithlak nawn pawh an hlawh thei hle. Mizo hla zingah pawh a hla te hi reels-a an hman nasat ber an ni hlawm awm a ni.

Asanga Project ft Ruth Tochhawng 'Thlaler rose par' chu chart hmasaa no. 6 aṭangin no. 2-ah a rawn invawrh chho bawk. He hla hi Asanga phuah niin, lairil fan raih mai niin, a video pawh en a nuam hle. Pathumnaah Lalhmangaihzuali (Nunui) 'Mi dawt sawi' a awm a, hei pawh hi 'Mo Sual' OST niin, a hla phuahtu hi Melody G. Fanai a ni. Aw mawi dangdai tak nei, Grace 10:45 chuan 'A vulmawi si' hmangi palina dinhmun a luah a, Ruth Roluahpuii 'Valmawi' chuan Top 5 a rawn khar.

Ṭhazual Lengzem Top 10 chart-ah hian Mabiaki Pachuau, C. Lalremruata, Dza Ralte, Ngurthangvela leh Drac Frost-te an lang bawk.