Leitlang Pictures leh Zonet ṭangkawpin an siam Rose series chu Ningani zan khan a tawp ta a, thlirtute'n hmuhnawm an titlang tih a hriat a, chhunzawmna beisei­tu pawh an tam ngei ang.

Rose hi July 7, Thawhleh­ni zanah premier a ni a, nizan hmasa khan a tawp ta a, season hnihna beisei chi a ni dawn em la hriat loh mah se a hmasa episode pariat chu mipuiin an hlut tih a hriat a, season tluana hmuhnawm ti taka thlirtu an tam.

Episode hmasa ber tihchhuah a nih tukah khan Zonet director LV Lalthan­tluanga chuan feedback an dawng ṭha nghal hle tih Vanglaini a lo hrilh tawh a, Nimina Vanglaini palaiin Zonet Director a biak lehnaah pawh feedback an dawng ṭha hle tih bawk a sawi leh a, chhunzawmna siam leh dawn pawh nise a inhawn hmel hle.

Episode tawp ber dawttuah khan HPC vice president Thangsailova chu kum 1987-a Hotel-a Rinpuii thihnaa a hnarkaitu ber a nih thu kan hre hman a, Hotel Malawma Harris Batachhari thihnaa pawh a inhnamhnawih ngei nia ringin thlirtu tam ber chuan thutlukna kan siam ngei ang. Mahse episode tawp berah erawh Harris-a thattu tak chu Lunglei SP Rinawma zawk tih leh a nu Rinpuii phuba a lakna atan engkim a lo ruahman tihte kan hre leh ta zawk a ni.  Thangsailova'n tan-in aṭang pawhin thil tam tak a la tihtheih zia a sawi bawk a, Harris-a thihnaah inhnamhnawihna a nei lo bawk nen, phuba lak ngei a tum hmel a, hei vang hian a chhunzawmna tur siam leh pawh nise a script ziaktu tan pawh chhunzawmna tur remchang tak a ni ngei ang.

Rose hi Mizo zinga film siam lama sulhnu neiṭha Mapuia Chongthu-in a film siam tawh zinga chhuanawm a tih ber pawl a nih thu a lo sawi tawh a, Mizo series siam tawh zinga en hlawh ber pawh a nih ngei a rinawm. Mizo-te hian series en tur kan ngah lo a, mi ṭhenkhat chuan a tawp hma an tih thu leh episode khat a rei lo an ti thute pawh sawi an awm ve nual bawk nen chhunzawmna hi mipui lam pawhin an beisei viauin a rinawm a ni.

La en lo tan tv.zonet.in-ah

Rose hi la en lo, en ve chak si tan Zonet digital platform tv.zonet.in-ah thla khata Rs. 500 chawiin en theihin an dah vek tawh a, a ngaihven chi hle ang. Zonet digital platform-ah hian Rose bakah Zonet show hrang hrang en turin an dah nual tawh a, 0389, Zawhna 98 leh Zonuni Nen Thingpui Sen-te pawh kha an dah vek tawh a ni.

Share this Post