Vanglaini - Billie Eilish hla thar 'My Future'

KHAWTHLIR

Lusûn khawhar

Liankunga (69), IAS (Rtd.) h/o Zalianthangi, Chaltlang, Aizawl chu nimin chhun dar 12:17 khan zunthlum natna vangin a thi a, nizan khan lumen niin, vawiin chawhma dar 11-ah vui a ni ang. Liankunga hi February 14, 1951-ah Khawbélah a piang a, fa pathum leh tu pali an nei. Mizoramah hna hrang hrang a thawk tawh a, kum 1981-ah police SI-ah a inziak tling a, kum 1982-ah Account & Treasury-ah assistant auditor-ah a inziak tling leh. Kum 1985-ah IAS-ah a inziak tling a, a hmain IAAS-ah tling bawk. IAS-ah hian Bihar cadre a ni a, Bihar sorkara principal secretary a nih laiin May 31, 2017-ah a pension a ni.

YMA din remti

YMA Central Executive Committee (CEC) nimina ṭhukhawm chuan, YMA branch thar pathum - Kharzawl branch (Serlui group), Halam Punjee branch (Zampuimanga group) leh Kolasib Venglai East branch-te din an remti. YMA branch pathum din thar a nih chuan YMA branch 811 a awm tawh ang.

CM-in thawh

Chief minister Zoramthanga chuan Covid-19 dona atan July-a a hlawh (basic pay) aṭanga 60% (Rs. 48,000) chu nimin khan Chief Minister's Relief Fund-ah a thawh.

Sample 100 en

ZMC Covid-19 Laboratory-ah nimin khan mi 100 velte swab sample endik a ni a, zan lamah result a chhuah beisei a ni. Sample endikte chu SRH-ZMC-a awmte bakah, Aizawl, Mamit leh Champhai aṭanga dawnte a ni.

Covid-19 vei mek ICU-ah 2 an awm

State Referral Hospital-ah nimin khan Covid-19 vei mi pathum leh rinhlelh thilah mi pathum dah luh thar an ni. SRH-ah hian Covid-19 vei mi 17 enkawl mek an ni a, ICU-a mi pahnih, SICU-ah mi pakhat leh Isolation Ward-ah mi 14 an awm. ICU-a awm pakhat zawk ventilator hmantir mek chuan hma a sawn hret a, Isolation Ward-a awm zingah khawsik leh thawhah nasa vak lo nei mi pali awm mah se, ngaihtuahawm an ni lo tih, SRH-ZMC Bulletin chuan a tarlang.

DAWNTISEI

Billie Eilish hla thar 'My Future'

Tleirawl zai thiam, style dangdai tak Billie Eilish chuan hla thar 'My Future' chu nimin khan a tichhuak.

Billie hian a hla thar tihchhuah hi a album thar tura mi a ni nge ni lo a sawi lo a, January thla khan kumina album thar a neih dawn loh thu a lo sawi tawh a, mahse a documentary erawh kuminah tihchhuah a tum thu a sawi thung.

Kum 18 mi Billie hian nikuma a album tihchhuah 'When We All Fall Asleep, Where Do We Go?' tih chu a lar pui hle a, kumin Grammy award semnaah pawh khan a che ṭha hle. A hla thar pawh hi a fan-te chuan an duh leh hle dawn tih a hriat nghal a, ngaihthla duh tan chuan YouTube leh streaming service hrang hrangah ngaihthlak theihin a dah chhuak nghal a ni.

Share this Post

Login to comment

No Comments