"Rust" film armourer thla 18 tang turin hrem

"Rust" film chan laia actor Alec Baldwin-a silai hmana a mu tak lo inthun vanga cinematographer kah hlum a nih thubuai kal zelah, he film-a silai hman tur buaipuitu, kum 26 mi Hannah Gutierrez-Reed chu thla 18 tang tura hrem a ni.

Kum 2021 khan New Mexico-a 'Rust' film chan laiin, Baldwin-a silai hman turah a mu lem thun loa, a mu tak a lo inthun avangin silai mu kah chhuah hian cinematographer Halyna Hutchins fuhin a thih phah a ni. He thil thleng vang hian Baldwin pawh hian thubuai a neih phah bawk. Film channaa silai hman tur lo buaipuitu, Gutierrez-Reed chu a hnaa inthlahdah leh fimkhur loa puhin, kumin March thla khan thiam loh chantir a lo ni tawh a, Thawhṭanni khan a hremna tur hi tihchhuah a ni ta a ni. Judge chuan Gutierrez Reed chuan ralthuam hlauhawm lo tur chu thihna thlentu ralthuamah chantirin, fimkhur takin thil ti ni se Hutchins chuan nunna a chan lo ang a, a pasal chuan nupui la nei rengin, a fapa naupang te pawh chuan nu a la nei dawn a ni, a ti.