Box Office-ah "Civil War" thawm a na

North American box office-ah indo thawm ri a ring a, 'Civil War' chuan tlangzarh karah USD mtd 25.7 la lutin no. 1 a ni.

Movie lian siam chhoh tumtu, A24-in opening weekend a neih ṭhat ber ṭum niin, he film siamna atan hian USD mtd 50 vel sen a ni a, studio-in film siamna atan a sen tam ber ṭum a ni. Beisei phak bakin "Civil War" hian thawm a rawn nei lian a, USD mtd 18-24 vel la lut tura an lo chhut lawkna chu a rawn khum thei a ni. Kumina R-rated movie opening nei ṭha ber a ni bawk.

Alex Garland-a dystopian action movie, 'Civil War'-ah hian Kirsten Dunst chu frontline journalist-ah changin, US-a civil war chhuak chungchang a cover a ni. Ani bakah Wagner Moura, Cailee Spaeny, Stephen McKinley Henderson, Sonoya Mizuno leh Nick Offerman-te an chang. CinemaScore-ah 'B-' hmuin, critics lamin Rotten Tomatoes-ah 83% rating an pe.

"Godzilla x Kong: The New Empire" chu kar hnih chhung no. 1 a nih hnuah no. 2-ah a tla thla a, USD mtd 15.45 a lak luh belh leh. USD mtd 5.8 la luttu, "Ghostbusters: Frozen Empire" chu no. 3-ah a awm a, "Kung Fu Panda 4" chu no. 4-ah awmin, USD mtd 4.3 a la lut a ni. No 5-ah "Dune : Part Two" rawn chhoin, USD mtd 4.3 a lak luh belh ve bawk.