Zaninah K-pop group 'BLITZERS' an che dawn

Aizawl-ah ngei K-pop group live concert kan en thei dawn e. K-pop group lar tak, 'BLITZERS' chuan nimin khan Aizawl an rawn thleng a, zanin hian LPS Arena, Falkland Veng-ah an che dawn.

BLITZERS concert hi Ace Business Group, BR Studios leh Pink Box Entertainment-te huaihawt a ni a, he event hi concert chauh ni loin, K-pop fan khawvel hmun tin ami ten an music leh culture an lo tema an hmelhriat theihna atana buatsaih a ni.

South Korean boy band, BLITZERS hi 12 May, 2021-a debut an ni a, K-pop industry-ah pawh thawm an nei lian chho hle. Wuzo Entertainment din niin, a tirah member pasarih an awm a, kumin January aṭang khan member paruk angin an ding tawh a, chungte chu - Jinhwa, Juhan, Sya, Chris, Lutan leh Wooju te an ni. Asia Artist Award, 2021-ah Focus Award leh K-Global Heart Dream Awards 2022-ah K-Global Rising Star Award pawh an lo dawng tawh a ni.

BLITZERS hian Aizawl an rawn thlen hnuah, nizan dar 6 khan Royale Lalawi Hotel Conference Hall-ah press conference an nei nghal a ni. Aizawla an rawn kal hi India Exclusive niin, zanina an concert-naah hian hla 19 an perform dawn. Aizawlah hian ni thum an cham dawn a ni.