Zaninah Mizo film thar 'Love has no boundaries'

Fadyo Pictures kutchhuak, Mizo film thar 'Love has no boundaries' chu zanin hian Vanapa Hall-ah ZOHANDCO chairman Lalliansawta chuan a tlangzarh dawn. April 13 zan dar 9 aṭangin Thulkhung App-ah en theiha chhawp chhuah a ni bawk ang.

Mizo lemchan khawvela kan hriat lar, C. Hmingthangvunga chu director leh producer a ni a, amah pawh hi a chang nghal bawk. Scriptwriter hi ziak mi kan hriat lar, Zoremi Hmar Zote a ni. Assistant director hi David L. Sangmuana niin, director of photography Zothana Hmar leh production manager TC Lalrinsanga te an ni.

A changtu turte hi Hminga bakah Hruaia Elfaza, David L. Sangmuana, Smriti Subba leh Lalrindiki Renthlei te an ni. 'Love has no boundaries' hi Gorkhali nula leh Mizo tlangval inngaihzawnna leh, Mizo nula pakhat a bialpain a hralh rukna lak ata a chhuah dante tarlanna a ni.

Zanina film tlangzarhna hun hmannaah hian Mizo nula huaisen, Delhi Police-a ṭang mek PC Vanlalruati chawimawina hun siam a ni bawk ang. Film en duhte'n Rs 100-in Vanapa Hall-ah ticket a lei theih dawn a, Thulkhung App-ah hian Rs 150-in lei theih a ni bawk ang.