Ṭhazual Lengzem-ah Omomi Khiangte a sang ber

Khiangte Construction Ṭhazual Lengzem chart tharah, rin lawk ang ngeiin Omomi Khiangte chuan 'Ka suihlung a leng lawng e' tih hmangin dinhmun sang ber a rawn luah ta.

Omomi hian hun eng emaw chen chart-ah a lanpui tawh, 'Ka suihlung a leng lawng e' tih hi hma a rawn sawnpui zel a, chart hmasaah pahnihna niin tun ṭumah chuan a chung ber dinhmunah a rawn awmpui ta a ni. Aw no nem tak a nei chungin, rock vibe lam pawh a thiam tel hle tih a rawn lantir. He hla hi February 18-a a tihchhuah kha niin, a hla phuahtu hi Robert Lalnghakliana a ni a, recording & mixing hi Roland Bethany Studio kutchhuak niin, guitarist Thawngmawi leh videographer ET te an ni.

F. Zomuanpuia pawhin 'Bâl an chhum (X-Ray)' chu pahnihnaah a rawn chhohpui a, Grace 10:45 'A vulmawi si' chu chart hmasaa pangana aṭangin pathumnaah a rawn invawrh chho bawk. Youngfella 'Pasalṭha (OST) leh Lalhmangaihzuali (Nunu-i) 'Mi dawt sawi' chu Top 5-ah a inhlangkai bawk.

Chart hmasa lama pakhatna, Asanga Project ft. Ruth Tochhawng chu paruknaah an tla thla ve thung a, Ruth Roluahpuii leh Mabiaki Pachuau pawh chart-ah an la lang chhunzawm. Hetih lai hian Top 10-ah hian lang thar pahnih - C. Lalremruata leh Dza Ralte te an awm.