Mizo rimawi khawvel tana mi hlu Vanhlupuii a liam ta

Mizo zinga All India Radio Top Grade artist awm chhun, Mizo rimawi khawvel tana mi hlu, Vanhlupuii chu kum 77 mi niin Inrinni, March 30, 2024 zing dar 2 khan a boral a, chawhnu dar 1-ah Dawrpui Multipurpose Hall, Pipu Tlang-ah Pastor Sabbaththanga, Aizawl Central bialtuin a vui liam.

Vanhlupuii hi hla phuah thiam Vankhama leh Laldengi te fa niin, kum 1973-ah S. Lalthlamuana nen an innei a, fapa pakhat leh fanu pahnih an nei a, a pasal leh a fate pahnih hi an boral tawh bawk. A fanu pakhat leh tu paruk a kalsan a ni.

Kum naupangte aṭangin a zai chho a, mipui hmaa a zai hmasak ber pawhin kum 5 mi lek a ni. A pa kaihhruaina hnuaiah zai hi a zir chho a, zai intihsiaknaah lawmman eng emaw zat lain, zirna bakah zai avangin ram pawn hmun hrang hrangah a zin kual nasa hle. Zirna lamah pawh Shillong aṭangin B.Com a pass a, Mizo hmeichhe zinga B.Com pass hmasa ber nia record a ni.

Kum 1957 aṭangin Radio-ah hla a record ṭan a, hla thlan hunah pawh a lang zing ber pawl a ni ṭhin. 1969 ah Grade ‘A’ ah a kai chho a, kum 1999-ah AIR, New Delhi chuan 'Top Grade Artist' nihna a pe a, Northeast-a pathum pek zinga pakhat niin, Mizo zinga pek hmasak ber leh awm chhun a ni rih.

Mizo Lengzem hla hluiho a sa tam a, a pa Vankhama hla a sa tam hle bawk. Radio-ah hian ama sawi danin hla 200 vel a khung a ni. Audio album hi pathum a tichhuak a, chungte chu 1984-ah 'Ṭhalai Huaisen' (Otto, Aizawl), 1985-ah 'I hun tithianghlim la' (USA), leh 1991-ah 'Vankhama Hlate' (Otto, Aizawl) te an ni. Krisian Hlabua mi album siam tur hi a buaipui bawk a, mahse, hei hi recording lam a ṭhat tak loh avangin an tichhuak ta lo.