Kimkima'n leikapui a bel dawn

'Sarah, I Zunzam'-a lo uai vawng vawng tawh Kimkima chuan hla thar a tichhuak dawn a, tunṭumah hi chuan leikapui lam a bel dawn thung.

Kimkima hla thar hi 'Leikapui Rûn Ka Bel' tih a ni dawn a, a hla pariatna tur a ni dawn. A hla hmasa ho ang bawkin hla lungkuai tak a ni lehpek dawn a, a 'Kimkima' leh vawng vawng dawn hle. A hla dang ang bawkin ama phuah ngei ni lehin a thluk pawh ama siam ngei a ni leh a, ngaihthlak a hlawh leh hle ang tih a rinawm.

Music a mawi dawn a, Ephraim-a kut chhuak a nih avangin guitar ri vel pawh a nalh no leh hle turah ngai ila, video chu Reuben Lalmalsawma kut chhuak a ni thung.  

"Tun ṭum chu philosophy lam ka rawn hrut dawn. Hmangaihna lam hla tho a ni dawn a, a ngaithlatute 'interpretation' a pawimawh dawn lutuk," tiin a hla thar tur chungchang hi Vanglaini a hrilh. Zanin hian Zonet lamah thlira ngaih­thlak theihin a awm ang a, karleh lamah a YouTube chan­nel Kimkima Offi­cial lamah thlirin a ngaih­thlak theih bawk ang.

Ṭhangthar zaithiam zingah chuan Kimkima hlate tluka Mizo zinga ngaihthlak hlawh hi a awm chuang awm lo e. 'I zun ngaih lunglen vangin' tih khan YouTube-ah thlirtu maktaduai 7.1 chuang a nei der tawh a, Mizo hlaah chuan hetiang dinhmun thleng thei hi an la awm lo hial mai thei! 'Sarah, I zunzam' khan thlirtu mtd 2.8 chuang nei bawkin million views hla dang pahnih pathum a la nei bawk.