Vanglaini - Russell Crowe-a'n a film chan a nu en a phal lo

KHAWTHLIR

IAS sîksawi

Mizoram sorkarchuan tun hnai khan IAS pathum a sîksawi. Serchhip DC Dr Lalzirmawia Chhangte chu secretary atan ruat a ni a, Printing & Stationery leh Fisheries department a chang ang. Siaha DC Bhupesh Chaudhary chu additional secretary atan ruat niin, Cooperation department a chang ang a, Aizawl additional DC Kumar Abhishek chu Serchhip DC a ni ang.

Mi pali dah lut

Covid-19 vei rinhlelh thilah nimin khan State Referral Hospital-ah mi pali dah luh thar a ni a, an zinga pahnih chu nimin khan swab sample laka endik nghal a ni a, he thu ziah lai hian result a la chhuak lo. Mi dang pahnih chu vawiinah endik an ni ang. SRH-ah hian Covid-19 vei mi 15 enkawl mek a ni a, Makeshift ICU-ah mi pakhat awmin, mi dang 14-te Isolation Ward-ah an awm.

Lungleiah Swab test

June 28, Pathianni khan Lunglei Civil Hospital laboratory-ah Truenat khawl hmangin swab sample 30 endik a ni a, June 27-ah sample 31 endik a ni bawk a; endik zawng zawngte'n Covid-19 an kai lo tih finfiah a nih thu sorkar thuchhuah chuan a tarlang. LCH laboratory-ah hian Pathianni thleng khan sample 299 endik a ni tawh a, sample pahnih chu Covid-19 positive angin a hmu a, ZMC-a endik nawnnaah positive pakhat zawk chu negative a ni tih hmuh a ni thung.

Hnathawh enfiah

Kolasib bialtu MLA K Lalrinliana chuan nimin khan a bial Diakkawn VC area chhunga MLA-LAD Fund, Excluded Area Grant leh Mizoram Finance Commission Grant hmanga hnathawh a hmunah kalin a enfiah a, MLA fund hmanga sak Neuva Section YMA Chawlhbuk chu a chung siam danah duhthu a sam loh thu sawiin, steel structure hmanga nalh zawk leh tha zawka siamtha tur leh estimate pawh siam tha leh turin a ti. K Lalrinliana chuan bial chhung mipuite chu MLA fund an ta a ni tih hria a, fund hmanga hnathawhte ngaihven a, enpui fo turin a chah.

DAWNTISEI

Russell Crowe-a'n a film chan a nu en a phal lo

Kum 56 mi Russell Crowe chuan a film chan thar, 'Unhinged' chu tlangzarh a nih hunah pawh a nu en a phal dawn loh thu a sawi.

'Unhinged' hi psychological thriller film niin Crowe hi The Man lemah a chang dawn a, film ralmuang tak a ni dawn lo. Hemi a nih avang hian a nu en atan a duh lo niin a lang.

Russell hian chhungkuaa en chi film eng emaw zat tunhnaiah a chang a, 'A Good Year', 'Robin Hood', leh 'Les Miserables'-te kha chu film en hahdam tak an nih laiin 'Unhinged' erawh hi chu naupang leh kum upa lam tan en chi lutuk a ni dawn lo a nih hmel.

Covid-19 hri len chhung hian Russell hi Australia-ah a nu leh pate nen an awm mek a ni.

Share this Post

Login to comment

No Comments