Vanglaini - UK Album chart-a No.1 nithei upa ber Bob Dylan

KHAWTHLIR

IAS sîksawi

Mizoram sorkarchuan tun hnai khan IAS pathum a sîksawi. Serchhip DC Dr Lalzirmawia Chhangte chu secretary atan ruat a ni a, Printing & Stationery leh Fisheries department a chang ang. Siaha DC Bhupesh Chaudhary chu additional secretary atan ruat niin, Cooperation department a chang ang a, Aizawl additional DC Kumar Abhishek chu Serchhip DC a ni ang.

Mi pali dah lut

Covid-19 vei rinhlelh thilah nimin khan State Referral Hospital-ah mi pali dah luh thar a ni a, an zinga pahnih chu nimin khan swab sample laka endik nghal a ni a, he thu ziah lai hian result a la chhuak lo. Mi dang pahnih chu vawiinah endik an ni ang. SRH-ah hian Covid-19 vei mi 15 enkawl mek a ni a, Makeshift ICU-ah mi pakhat awmin, mi dang 14-te Isolation Ward-ah an awm.

Lungleiah Swab test

June 28, Pathianni khan Lunglei Civil Hospital laboratory-ah Truenat khawl hmangin swab sample 30 endik a ni a, June 27-ah sample 31 endik a ni bawk a; endik zawng zawngte'n Covid-19 an kai lo tih finfiah a nih thu sorkar thuchhuah chuan a tarlang. LCH laboratory-ah hian Pathianni thleng khan sample 299 endik a ni tawh a, sample pahnih chu Covid-19 positive angin a hmu a, ZMC-a endik nawnnaah positive pakhat zawk chu negative a ni tih hmuh a ni thung.

Hnathawh enfiah

Kolasib bialtu MLA K Lalrinliana chuan nimin khan a bial Diakkawn VC area chhunga MLA-LAD Fund, Excluded Area Grant leh Mizoram Finance Commission Grant hmanga hnathawh a hmunah kalin a enfiah a, MLA fund hmanga sak Neuva Section YMA Chawlhbuk chu a chung siam danah duhthu a sam loh thu sawiin, steel structure hmanga nalh zawk leh tha zawka siamtha tur leh estimate pawh siam tha leh turin a ti. K Lalrinliana chuan bial chhung mipuite chu MLA fund an ta a ni tih hria a, fund hmanga hnathawhte ngaihven a, enpui fo turin a chah.

DAWNTISEI

UK Album chart-a No.1 nithei upa ber Bob Dylan

Rock icon Bob Dylan chuan a album thar 'Rough And Rowdy Ways' hmangin record thar a siam a, UK Album chart-a No.1 ni thei upa ber a ni.

Kum 79 lai ni tawh Bob Dylan hian June 19 khan a album 39-na 'Rough And Rowdy Ways' hi a tlangzarh a, June 26 thleng khan chart sale 34,000 neiin UK Album chart-ah No.1 a ni a, Paul Simon record lo siam tawh chu a khum. Paul Simon hian kum 2016 khan a album 'Stranger To Stranger' hmangin UK Album chart-a No.1 ni thei upa ber record a lo siam tawh a, hetih lai hian kum 74 niin Dylan hian hei hi a rawn khum ve leh ta a ni.

Dylan hian kum riat lai a liam hnuah hla thar hlak awmna album 'Rough And Rowdy Ways' hi a tlangzarh a, fak a hlawh zui hle. Rolling Stone chuan 'one of his most timely albums ever' tiin a comment hial.

Kum 56 liam taah khan Dylan hian a album pahnihna 'The Freewheelin' hmangin UK Album chart hi a lo thunun tawh a, kum tam tak a liam hnuah he dinhmun hi a rawn luah leh thei chiah a ni. Nobel Prize hial pawh lo dawng tawhtu Bob Dylan hian kum 1962-ah daih tawh khan a album hmasa ber a lo tlangzarh tawh a, khawvel huapa hla lar eng emaw zat phuah tawhin chawimawina pawh a dawng hnem tawh hle a, kum 2016 khan Nobel Prize in Literature hial pawh a lo dawng tawh a ni.

Share this Post

Login to comment

No Comments