Vanglaini - ṬHAZUAL FAKNA-ah Bethsy Lalrinsangi 'Isua nen chuan' a mawi ber

KHAWTHLIR

IAS sîksawi

Mizoram sorkarchuan tun hnai khan IAS pathum a sîksawi. Serchhip DC Dr Lalzirmawia Chhangte chu secretary atan ruat a ni a, Printing & Stationery leh Fisheries department a chang ang. Siaha DC Bhupesh Chaudhary chu additional secretary atan ruat niin, Cooperation department a chang ang a, Aizawl additional DC Kumar Abhishek chu Serchhip DC a ni ang.

Mi pali dah lut

Covid-19 vei rinhlelh thilah nimin khan State Referral Hospital-ah mi pali dah luh thar a ni a, an zinga pahnih chu nimin khan swab sample laka endik nghal a ni a, he thu ziah lai hian result a la chhuak lo. Mi dang pahnih chu vawiinah endik an ni ang. SRH-ah hian Covid-19 vei mi 15 enkawl mek a ni a, Makeshift ICU-ah mi pakhat awmin, mi dang 14-te Isolation Ward-ah an awm.

Lungleiah Swab test

June 28, Pathianni khan Lunglei Civil Hospital laboratory-ah Truenat khawl hmangin swab sample 30 endik a ni a, June 27-ah sample 31 endik a ni bawk a; endik zawng zawngte'n Covid-19 an kai lo tih finfiah a nih thu sorkar thuchhuah chuan a tarlang. LCH laboratory-ah hian Pathianni thleng khan sample 299 endik a ni tawh a, sample pahnih chu Covid-19 positive angin a hmu a, ZMC-a endik nawnnaah positive pakhat zawk chu negative a ni tih hmuh a ni thung.

Hnathawh enfiah

Kolasib bialtu MLA K Lalrinliana chuan nimin khan a bial Diakkawn VC area chhunga MLA-LAD Fund, Excluded Area Grant leh Mizoram Finance Commission Grant hmanga hnathawh a hmunah kalin a enfiah a, MLA fund hmanga sak Neuva Section YMA Chawlhbuk chu a chung siam danah duhthu a sam loh thu sawiin, steel structure hmanga nalh zawk leh tha zawka siamtha tur leh estimate pawh siam tha leh turin a ti. K Lalrinliana chuan bial chhung mipuite chu MLA fund an ta a ni tih hria a, fund hmanga hnathawhte ngaihven a, enpui fo turin a chah.

DAWNTISEI

ṬHAZUAL FAKNA-ah Bethsy Lalrinsangi 'Isua nen chuan' a mawi ber

Ṭhazual Fakna chart-ah Bethsy Lalrinsangi 'Isua nen chuan' chu No.1-ah a rawn invawrh a, Mawitea 'Chibai ka buk che' chu pahnihna niin Lalthlengliani Jongte 'A hming fak la' chu pathumna a ni bawk.

'Isua nen chuan'-in hma sawn chak

'Min hmangaih si a' thiam taka satu Bethsy Lalrinsangi hla mawi tak 'Isua nen chuan' hi March thla tir lama a tihchhuah kha a ni a, thla thum pawh a ral hmain Ṭhazual Fakna chart-ah No.1 a ni tawh.

Music video pawh a hmuhnawm a, model-ah pawh Miss Mizoram 2017 Rody H Vanlalhriatpuii ngat a hmang a, YouTube-ah pawh mi nuai riat dawnin an thlirin an ngaithla tawh a ni.

He hla hi a satuin a sak thiam piah lamah a hla thu a ṭhain a hla thluk a mawi bawk a, chart-a No.1 a ni thei pawh hi a mak lo hle.

'Isua nen chuan' hi chart hmasa lamah khan parukna a ni a, tunah erawh pakhatna a rawn ni der a, ngaihthlak leh thlan a hlawh tih a hriat a, nek chhuah pawh a huphurhawm hle ang. Tunhnaia fakna hla tihchhuahah chuan ngaihthlak hlawh ber zinga mi a ni tih a chiang a, chart-a pakhatna dinhmun hauh nawn thei hi tunhnaiah an tam lo hle a, Bethsy pawh hian a dinhmun hi a hum thei angem tih hriat a chakawm tawh hle a ni.

A hmun ngaiah Mawitea

Mawitea 'Chibai ka buk che' chu pahnihnaah a awm leh a, chart hmasa lama a dinhmun ngaiah a awm nawn leh a ni.

Lalthlengliani Jongte chuan hma a sawn zel thung a, chart hmasa aiin a dinhmun a sawh nghet hret a, a hla 'A hming fak la' chu pathumna a rawn nihpui tawh a, hma a sawn zel pawh a rinawm.

Hmingtea Chhangte leh Seraphic Choir

Hmingtea Chhangte pawhin 'Hun duhawm' chu hmasawn pui zelin pasarihna aṭangin palinaah a rawn invawrhpui a, Seraphic Choir hla 'Hnehna Lallukhum' chu pariatna aṭangin panganaah an rawn insawn bawk a ni.

Ṭhazual fakna chart-ah hian zaithiam lar tak tak top 10-a lang an awm nual a, chung zingah chuan Pensy, One In Christ leh Fiona Lalmalsawmite pawh an tel.

Ṭhazual Fakna chart Top 10:-

1Bethsy Lalrinsangi - Isua nen chuan

2Mawitea- Chibai ka buk che

3Lalthlengliani Jongte- A hming fak la

4Hmingtea Chhangte- Hun duhawm

5Seraphic Choir- Hnehna Lallukhum

6Pensy- Ka tan Krawsah ngei chuan

7One In Christ- Zing Daifim

8Mapuii- Zirtirtu ṭha

9Fiona Lalmalsawmi- Kristaa lawmna

10Lalbiaktluanga (Btea)- Fak tlak I ni

Share this Post

Login to comment

No Comments