MrBeast-a'n USD mtd 5 lawmman awmna reality show siam dawn

Jimmy Donaldson, MrBeast tia hriat lar chuan Prime Video nena thawk dunin, reality game show lian ber a siam dawn tih a puang.

YouTube creator hian hemi chungchang hi X-ah a post a, show-ah hian contestant 1,000 an awm ang a, cash prize USD mtd. 5 inchuhin an inel dawn tih a sawi. Lawmman hi television leh streaming-ah single prize tam ber ṭum a ni ang.

Competitive reality series hi a YouTube show behchhanin, 'Beast Games' tih a ni ang. Prime Video-ah ram leh territory 240 chuangah pek chhuah a ni dawn a, MrBeast chu host niin, show executive producer a ni nghal dawn bawk. Show neih hun tur tak hi puan a la ni lo thung.

MrBeast chuan, "Ka tum ber chu show ropui ber siam leh, YouTuber leh creator-te hi platform dangah pawh kan hlawhtling thei a ni tih lantir a ni," tiin a sawi. YouTube chanchinah mimal zinga subscriber ngah ber ni mekin, subscriber hi mtd 245 vel a nei a, creator hlawhtling ber zingah chhiar a ni bawk. Online lama a chettlatna bakah, MrBeast hian snack brand, Feastables a nei bawk a, charity lamah a inhmang nasain, leilung humhalhna kawnga hma latu, TeamTrees leh TeamSeas dintu zingah a tel bawk a ni.

Amazon MGM Studios head, Jennifer Stalke chuan MrBeast an thawhpui tur chu a phur tawh hle tih sawiin, Beast Games buatsaih dan tura a hmathlir neihte chu a ṭhat thu leh, reality TV tan standard thar a siam ngei dawn niin a sawi.