Zonet leh Nuna Hrahsel thawk dun turin an inrem

Zonet TV Pvt. Ltd. leh film maker/screenwriter Nuna Hrahsel chuan March 19, 2024 khan film project atana thawhhona tur inremna an ziak. He project hi Nuna Hrahsel in a buaipui ang a, Zonet-in a produce ang. June thla tawp lamah Zonet Empai mobile application-a tihchhuah hman beisei a ni.

Zonet Director L.V.Lalthantluanga chuan Nuna Hrahsel nena an thawkho thei tur chu lawmawm a tih thu sawiin, film industry lamah ke an pen zui tur thu leh, chumi atana Zonet Empai tihchangtlun a nih tur thu a sawi. "Kumin kum laihawl aṭangin Zonet Empai-ah film release ṭan a ni ang a, Empai subscription pangngai bakah film ṭha tak tak hmachhawp kan nei mek a ni," a ti. He film project atana inremna an siam bakah, Crime Romance Film atan Nuna Hrahsel hi inbiakna an neihpui mek bawk a, Zonet bulṭantute zinga mi, Mizo film lama sulsutu, Biakthansanga'n thil thleng tak tak behchhana a script ziah pawh hmachhawp zinga a tel thu a sawi bawk.

Nuna Hrahsel hi Mizo film industry-ah a mikhual lo a, feature film pahnih 'Comrades' leh 'Ramri' te a siam tawh bakah, Mizo film lar 'Ambush' leh 'Mo sual' screenplay ziaktu niin, tuna shooting neih mek 'Dak Pu' screenplay pawh ama ziah bawk a ni. 2023-a Synod buatsaih, Kristian Film insiamsiaka pakhatna dawngtu, Kolasib Diakkawn Kohhran Film siam, 'Buangṭingṭanga' story leh screenplay pawh ama ziah bawk a ni.