Billboard Adult Pop Song Chart. Maroon 5 an ropui ber . 'Smooth' hla a hit ber

Billboard chuan an chart hrang hrang zinga pakhat 'Adult Pop Song Chart' chu kum 20 chhung an lo kalpui tawh a, chhinchhiah tlak an tar chhuak a, band, group leh mimal hmingah chuan Maroon 5-in pakhatna an hauh ngun ber a, Carlos Santana leh Rob Thomas te hla hit 'Smooth' chu hla mala pakhatna luah ngun ber a ni.

Kum 20 chhung Billboard-in Adult Pop Songs Chart an lo siam tawh, radio play hnem aṭanga an tehah Santana leh Rob Thomas te hla 'Smooth' chu an play ngun ber a ni. He chart hi kum 1996, March 16 aṭanga siam ṭan a ni. 'Smooth' hla hi kum 1999 - 2000 chhung khan chawlhkar 25 chhung zet mai pakhatnaah a awm thei a, hetiang tluka pakhatna hauh hla dang a la awm loin a awm leh tawh rih lo.

Train hla 'Drops of Jupiter (Tell Me)' chu pahnihnaah a lang a, The Calling hla hit 'Wherever You Will Go' chu pathumnaah langin, The Fray hla 'How To Save A Life' chu palinaah te, OneRepublic hla 'Counting Stars' chu panganaah te an lang.

Maroon 5 hi mimal, group leh band-ah chuan hlawhtling ber an ni. Adult Pop Songs-a pakhatna hauh thei hla 11 zet an nei a, chu mai bakah chuan an hla 19 zet chu top 10-ah an lang thei a ni. Kum 2003, April 5 khan pakhatna an rawn hauh ṭan a, Harder to Breathe hla hmang khan a ni. Chumi hnuah This Love te, She Well Be Loved te a rawn hit leh a, heng hla pahnihten pakhatna an hauh belhkhawm hi vawi 13 zet a ni a, kum 2004 kha a ni.

Maroon 5 dawta hlawhtling leh chu Matchbox Twenty kha a ni a, kum 1997 aṭang khan chart-ah hian an lang ṭan a, top 10-a lang thei hla 13 zet an neih bakah, pakhatna hauh thei hla pali lai an nei. Trains chu pathumna niin, top 10-ah hla 13 an nei a, Nickelback chu palina an ni a, Pink chu panganaah a lang.