Darbu-ah Matilda & The Quest album hralh hnem ber

Darbu Music App-in February, 2024 chhunga a hralh chhuah hnem ber chu Matilda & The Quest album, 'Damdiai' a ni a, hemi chhung veka an app-ah hla play hlawh ber chu K.Hminga hla, ''Ti'ang tur tih hria ila' tih a ni.

'Thinlung hliam' hla aṭanga kan hriat lar, musician ṭha rual awmkhawmna band, Matilda & The Quest hian an album hmasa ber, 'Damdiai' hi February 2 khan an release a, he album-ah hian hla pakua a awm a ni. Darbu app-ah lei theihin an dah nghal a ni. Matilda Amawii aw tliang mawi leh fai tak, an music inchawih tak mai hi ngainatu an tam a, an album leitu an ṭhahnem hle a, February thlaa music app kaltlanga hralh chhuah hnem ber an rawn ni thei nghal a ni. Album hralh chhuah tam lamah K.Hminga 'Ka ngaih, Zawng ho' chu pahnihnaah a tla thla a, Top 5-ah hian One in Christ, Vohbik leh The Leprosy Mission Choir-te soundtrack an la lang bawk a, zaimi tam takin an hmang ṭangkai hle.

February thla chhunga Darbu music app-a hla play hlawh zual Top 10 chu K.Hminga hla ten an hauh leh deuh vek a, No 9-ah Matilda & The Quest hla 'Di Ruk' rawn langin, a bak chu K. Hminga hla vek an la ni a, ngaithlatuten an la kham thei lo a ni.