Vanglaini - HT Lalthanzami hla thar zaninah

KHAWTHLIR

CM-in enfiah

Chief minister Zoramthanga chuan nimin khan National Highway (NH) 54, Khamrang-Buichali inkar kawngpuia PWD chan a enfiah a, "Fûrpui kan hmachhawn turah NH-54 kawngpui hi a pin mai loh nan theih ang anga hmalak a, a chhe zual laite thawm

ṭhat a ngai. A ṭul a nih chuan state sorkar sum pawh a remchan dan ang zela hman ni se," a ti a; state economy inkhai chhuahna tura mamawh tam tak zingah inkalpawhna ṭha neih a pawimawh tih sawiin, thawktute chu ṭhahnemngai taka hma la turin a chah.

Chan insem

Mizoram páwn aṭanga rawn lut, Aizawl khawpuia quarantine facitity hrang hranga ni 14 chhung khung hrante chu Indian Medical Association (IMA), Mizoram Government Doctors’ Association (MGDA) leh private hospital fawng vuantute zing aṭanga din Medical Operation Team-te'n an vilpui dawn a; quarantine facility chan insemin khung hrante hriselna an enfiah ṭhin ang. Aizawl khawpui páwn lama khung hrante chu district-a chief medical officer-te'n an vil zui zel dawn a ni.

OPD sawn

Aizawl Civil Hospital (ACH) out patient department (OPD)-ah mipui inentir an tam ṭhin a, social distancing a taka kalpui a harsat avangin Medicine OPD chu May 20, Nilaini aṭang khan Dawrpui Multipurpose Centre-ah sawn a ni. ACH Medical Superintendent chuan man chawi loa hall hmantir an nih avangin Dawrpui khawtlang hruaitute chungah an lawm thu a sawi.

Ramri vengtute kan

Kolasib District Border Safety Monitoring Team-te chuan nimin khan Covid-19 doa ramri vengtu South Chhimluang leh North Thinglian task force-te hnenah buhfai ip 15, dailuah leh alu ip 8 an hlân. Team hian ramria task force duty-te an tlawh kual ṭhin a, an mamawh hrang hrangte an ngaihtuahsak ṭhin a ni.

DAWNTISEI

HT Lalthanzami hla thar zaninah

Vulmawi best female artist award 2019 dawngtu HT Lalthanzami hla thar 'Di Bawihte' tih chu zanin dar 7-ah hian EME Records YouTube channel-ah tihchhuah a ni dawn.

He hla hi LV Chawngthu phuah a ni a, a thluk erawh hi chu amah HT Lalthanzami phuah hi a ni thung. Music leh recording hi EME Records kut chhuak niin Make Up chu Kymz Ralte a ni a, music video hi Hebron Pictures kut chhuak a ni bawk.

HT Lalthanzami hian hla eng emaw zat tichhuak tawhin YouTube lamah pawh thlirtu a ngah ṭhin hle a, thlirtu nuai chuang a nei tlangpui a, a hla ṭhenkhat chuan maktaduai dawn thlirtu a nei tawh. Ṭhazual chart-a ṭum eng emaw zat No.1 lo ni tawh Lalthanzami hla thar hi a nalh leh hle turah ngai ang.

Share this Post

Login to comment

No Comments