Vanglaini - Grace 10:45 hla thar 'I tan ka ti Ṭhapui'

KHAWTHLIR

CM-in enfiah

Chief minister Zoramthanga chuan nimin khan National Highway (NH) 54, Khamrang-Buichali inkar kawngpuia PWD chan a enfiah a, "Fûrpui kan hmachhawn turah NH-54 kawngpui hi a pin mai loh nan theih ang anga hmalak a, a chhe zual laite thawm

ṭhat a ngai. A ṭul a nih chuan state sorkar sum pawh a remchan dan ang zela hman ni se," a ti a; state economy inkhai chhuahna tura mamawh tam tak zingah inkalpawhna ṭha neih a pawimawh tih sawiin, thawktute chu ṭhahnemngai taka hma la turin a chah.

Chan insem

Mizoram páwn aṭanga rawn lut, Aizawl khawpuia quarantine facitity hrang hranga ni 14 chhung khung hrante chu Indian Medical Association (IMA), Mizoram Government Doctors’ Association (MGDA) leh private hospital fawng vuantute zing aṭanga din Medical Operation Team-te'n an vilpui dawn a; quarantine facility chan insemin khung hrante hriselna an enfiah ṭhin ang. Aizawl khawpui páwn lama khung hrante chu district-a chief medical officer-te'n an vil zui zel dawn a ni.

OPD sawn

Aizawl Civil Hospital (ACH) out patient department (OPD)-ah mipui inentir an tam ṭhin a, social distancing a taka kalpui a harsat avangin Medicine OPD chu May 20, Nilaini aṭang khan Dawrpui Multipurpose Centre-ah sawn a ni. ACH Medical Superintendent chuan man chawi loa hall hmantir an nih avangin Dawrpui khawtlang hruaitute chungah an lawm thu a sawi.

Ramri vengtute kan

Kolasib District Border Safety Monitoring Team-te chuan nimin khan Covid-19 doa ramri vengtu South Chhimluang leh North Thinglian task force-te hnenah buhfai ip 15, dailuah leh alu ip 8 an hlân. Team hian ramria task force duty-te an tlawh kual ṭhin a, an mamawh hrang hrangte an ngaihtuahsak ṭhin a ni.

DAWNTISEI

Grace 10:45 hla thar 'I tan ka ti Ṭhapui'

'No khat' tih hla dangdai tak hmanga Mizo mipuite min awi tawhtu Grace 10:45 chuan Nilaini zan dar 10:45 khan YouTube-ah music video thar 'I tan ka ti Ṭhapui' a tichhuak.

'I tan ka ti Ṭhapui' hi inhmangaih tak, lockdown vanga inhmu thei lo, lungleng taka hun hmangte hnemna atan liau liaua a phuah a ni a, lockdown karah harsa tak chungin music video shooting hi an zo thei a ni.

Grace 10:45 hi a hla a nalh dangdai ṭhin hle a, 'Sulhnu' ang bawkin a YouTube channel-ah thlir theih turin a dah chhuak a, ngaihthlak a nuam lehpek hle. A music bakah a zai a hahdam a, a hlathuin ngaihno a bei hle bawk.

"He hla hi 2020 quaratine laia ka ziah a ni a, lockdown vanga hmangaih êm êmte hmel pawh hmu thei lo, thlahlel bawk site tana inhnemna tur chi a ni. Hmangaih nei ve tawh zawng zawng tan ka rawn hlan e," tiin YouTube-ah hian a ziak tel a ni.

Share this Post

Login to comment

No Comments