Khiangte Construction Ṭhazual Lengzem : No. 1-ah Ngurthangvela

Khiangte Construction Ṭhazual Lengzem chart-ah zaithiam chuai thei lo, Ngurthangvela'n a nupui fam ta, Nupuii puala a phuah, 'Ka Phatsan lo'ng che darling' tih chu no. 1 a ni.

He hla hi kumin January 20 khan YouTube-ah dah chhuah a ni a, view pawh a ngah chak hle. Music video hi Ṭhate Ralte Videography siam a ni. Ngurthangvela hian a nupui, natna avanga enkawl ngai chu hun rei tak duat taka enkawlin, amah ngei pawh rilrunain beidawn chang nei mah se, a nupui a hmangaihna hian chuai ni a nei dawn chuang lo tiin he hla hi a phuah chhuak a ni. January 16 khan anmahni inah video hi an shoot a, mahse, hemi ni vek tlai dar 6-ah a nupui hian a boralsan ta a ni.

Ṭhazual chart-a pahnihna chu Drac Frost 'Khawvel dang' niin, January 20 vek a tihchhuah kha a ni a, a music video hi Juitea siam a ni. A hla hi a mawiin a emotional a, ngaithlatu rilru a luah zui thei hle ang. Drac Frost feat Lunghlutei 'Nipui hmangaihna' chu pariatnaah a lanpui thei bawk. Pathumnaah Dorothy Grace & Cungkip 'Nang leh Kei' rawn langin hma an rawn sawn zel. Hlana & Mabiaki 'Darmani zai' pawhin ngaithlatu an la ngah chhunzawm zel a, palinaah awmin Asanga Project ft. Fawni Ralte 'Kan nunhlui' chu chart-ah rawn lang tharin pangana an rawn ni thei nghal.

Ṭhazual Lengzem Top 10-ah hian lang thar an awm nual a, JH Peka, Lalṭanpuia Sailung, Nicholas & Nunui te an rawn lang a, anni bakah chart hmasa lama lo lang tawh, Benidict Fanai pawh a la cham chhunzawm zel bawk.