Aizawl FC-in phuba an la thei ang em?

Vawiin chawhnu dar 2:00 hian Aizawl FC-in Namdhari Stadium-ah Delhi FC an hmachhawn dawn. Mizo club hian tun season home match hmasa berah 5-1 ngawtin Delhi hi an hneh lo a, tun ṭumah hian phuba lak an tum dawn.

Aizawl FC hian kumin aṭangin Bobi Stojkoski hnuaiah an khel ṭan a, match hmasa berah league hmahruaitu Mohammedan SC nen goal awm loin an inhnehtawk. Kolkata club hian Mizo club an hmachhawn zawhah Rajasthan FC 5-1 in an sawp a, coach Bobi hnuaia Aizawl FC game mawi tawk lo mah se Mohammedan laka point khat hmuh hi result ṭha tiin a sawi theih.

Delhi FC lakah Aizawl FC-in point thum hlawhchhuah an tum a, chutihrualin an kim dawn lo tih hriat a ṭha. Top scorer ni mek Lalrinzuala chu inhliam vangin a zin ve lo a, inhliam vang thoin goalkeeper Nora Fernandes, defender Ivan Maric leh midfielder K. Lalrinfela te an zin lo bawk.

Bobi-a'n Delhi hmaah Aizawl FC team ṭha ber a chhawp chhuak thei dawn lo a, chutihrualin Delhi FC hi player thar Lalhriatpuia bakah Polish midfielder Rafał Zaborowski te tan hming chherna hun ṭha a tih theih ang.

Delhi hian Real Kashmir hnehin kum 2023 khar mah se kumina an match hmasa berah erawh Trau lakah 5-3 ngawtin an tlawm. Tun hnai result aṭanga teh chuan tun hi Aizawl FC tan point thum hmuhna remchang a ni.