March 22-ah LPS Cup final

LPS Cup Inter Village Football Tournament hmawr bawkna chu March 22, Zirtawpni zan hian RG Stadium, Mualpuiah khelh a ni dawn. Aizawl DFA buatsaih veng/khua inelna hi February 16, Zirtawpni zan hian Chanmari YMA Hall, Aizawlah pet hawnna neih a ni ang a, February 20, Thawhlehni aṭangin khelh ṭan a ni ang.

Inelna round tir lam hi 1st MAP Ground, Armed Veng leh MFA Ground, Sairang Dinthara khelh tura ruahman a ni a, amaherawhchu kalkawng chungchangah harsatna awm thei a nih avangin MFA Ground aiah Ramhlun Sports Complex-ah khelh a ni ang.

Tun ṭum inelna hi artificial turf leh leiah khelh a ni dawn a, fixtures vannei deuh a awm theih dawn. Chutihrualin thla khat chhung leka zawh a nih dawn avangin match hi a zawn chho dawn a, player-ten hahdamna hun an mamawh dawn avangin MFA Ground aia Ramhlun Sports Complex-a khelh hi team tam zawk tan a ṭha zawk tura ngaih a ni.

LPS Cup-ah hian team 62 an tel a, Aizawl chhung team 41 leh Aizawl pawn team 21 an ni ang. Aizawl DFA hnuaia inelna vawi sarih neih tawha champion thei team pali Ramhlun South (vawi thum), Armed Veng (vawi hnih), Bethlehem Vengthlang leh Chhinga Veng an awm a, an vai hian an tel kim vek.

Aizawl DFA buatsaih a nih angin Aizawl district tan chauh a ni a, chutihrualin MFA-in a phalsak angin Aizawl District pawn aṭangin Sialhawk, Keifang Joint, Thenzawl Joint leh Kawnpui Joint te an tel bawk ang.