Sports Minister-in Mizoram team training tlawh

Mizoram sports minister Lalnghinglova Hmar chuan nimin khan MFA hruaitute nen Santosh Trophy final khel tura inpuahchah mek Mizoram team a tlawh a, fuihna hun a hmang.

Tetea Hmar chuan, "Champion a pawimawh a, chak hi a pawimawh ber. Game mawi khelh a, champion loh chhuanlam ṭha tak neih aiin champion a pawimawh zawk. Chuvangin champion tuma feh chhuak turin ka chah duh che u," tiin a fuih.

Mizoram Sports Minister hi Mizoram football-in India rama hmun sang tak a thlen theih nan a thawh hlawk a, AIFF hruaitu zinga mi a la nih bakah MFA honorary secretary hna a la chelh reng bawk. Tun ṭuma Mizoram team-a senior player ho hi chu a hre chiang em em a, thiam takin mimal takin a fuih hlawm bawk.

Player chungchang sawi zuiin Tetea Hmar chuan, "Senior player-te Mizoram tana in rawn pen chhuak hi kan lawm takzet a, in tan chuan thil thar a ni tawh lo. Chutihrualin Mizoram tan in rawn pen chhuak a, nomawi duha tuihal turin ka beisei che u. Player naupang zawk tan chuan tun hi hming chher hun a ni a, in hmalam hun a tan a pawimawh a ni. Mizoram tan leh in tan intheihna zawng zawng hlan ang che u," tiin a fuih a, Sports Minister leh MFA hruaituten an tlawh avangin team boruak pawh a nun phah hle.

MFA hian Mizoram team-te hi chaw hlui an kilpui nghal bawk. Tun ṭum Mizoram team hi manager K. Lalenghluna (Maenga) leh coach Lalsangzuala Hmar ten an kaihhruai a, nikum khan Amritsar-ah group stage khelin final round khel turin an inpettling.

Mizoram team hian February 18, Pathianni hian Aizawl chhuahsanin inelna hmun Itanagar, Arunachal Pradesh an pan ang. Inelna hi February 21, Nilaini aṭanga ṭan tur a ni a, Mizoram hian match hmasa berah Maharashtra chu February 22, Ningani zan dar 7:00-ah an hmachhawn ang.