Champion lai TBL hnehtu Zarkawt BCA

Mizoram Super League 9 an khel ṭan a, team ṭha pahnihin inkhel hmuhnawm an rawn chhawp chhuak nghal. Zarkawt BCA chuan champion lai Khatla TBL chu 99-94 in an hneh.

Tualchhung basketball huangah chuan TBL leh BCA hi sulhnu nei ṭha an ni a, an match hmasa ber aṭangin entu pawh an tam nghal. Mipui lamin an beisei inkhel hmuhnawm an hmu a, BCA chakna hi point nga chauh a ni.

Lalrina Renthlei a la danglam lo - Mission Veng Vikings leh Zarkawt BCA champion pui tawhtu hian point 31 a nei, Zarkawt team tana point nei hnem ber a ni, 3-points nei tura a shot vawi nga a hlawhtling fai vek.

Tuikhuahtlang star Lalrina bakah hian Emmanuel Malou (20 points) a che ṭha bawk. Malou hian an khingpuite basket neih tur vawi sarih ngawt a dansak (block) thei, basket neih bakah lo dan theih hi a pawimawh.

Captain Matthew Remtluanga Sailo (10 points) leh Zonunsanga (13 points) ten a khat tawkin basket an nei ve reng thei bawk a, player pali ngawtin point 10 an nei tling thei - TBL tan ven ngai an tam tihna a ni a, hna a hautak hle.

Champion lai TBL lamin fiahna hmasa an paltlang lo tiin a sawi theih, season hmasa lama an champion pui Joshua Aaaron Keys an nei leh a, ani hian point 37 ngawt a nei a, captain Vanlalṭhazuala'n point 26 nei bawk mah se player dang an che ṭha tawk lo.

Quarter hmasa berah point ngain hma an hruai thei a, mahse quarter hnihna bikah chuan 13-28 ngawtin an hnufual zawk. Quarter tawp berah rawn sang zawk leh mah se, a belhkhawmah BCA an chungnung.

MSL hmasa pahnih champion TBL hian Keyes chungah rinna an nghat nasa, a theihna a san avangin a mak lo. Chutihrualin an elpui club dangten an ven fuh a, a kut a chawlh deuh vaih chuan na takin an tuar thei tih a lang bawk.

Match hmasa berah chak lo mah se TBL hi an chhe ta duai tihna a la ni lo, tualchhung player ṭha Ṭhazuala an la nei a, ani leh Keyes hi an inkawp rem chho leh a nih chuan champion pui tham an ni thung - zanin dar 5:30 hian Mission Veng Hotshots nen an inkhel leh ang. Inkhel dangah Hotshots hian Chanmari Vikings chu 77-66 in an lo hneh ve thung a ni.

Hnehna nena bul ṭantu Zarkawt BCA hian nizan khan Venghlui VR4 an hmachhawn zui leh a, result kan hre hman lo.